वीरगञ्ज । मोरङ पथरी–९ का पदमसिंह तामाङले पोल्यान्ड जान भनेर चार लाख २० हजार रुपैयाँ एजेन्टलाई बुझाए । वैदेशिक रोजगारीमा साउदी र मलेसिया पुगेर फर्किइसकेका तामाङलाई पोल्यान्ड जाने र सुनौलो भविस्य बनाउने रहर जाग्यो । चितवन जगापुरका सन्तलामा घिसिङले पोल्यान्ड पठाइदिने भनेपछि तामाङले उनलाई पैसा दिए । सन्तले मोरङ उर्लाबारीका ज्ञानेन्द्र तामाङ, इटहरीका देवराज अधिकारी र अनिल योञ्जनलाई पोर्चुगल पठाइदिन्छु भन्दै ४ लाख २० हजारका दरले पैसा लिए ।

बुद्ध शान्ति गाउँपालिका–२, पाँचथरका रुद्र प्रसाद घिमिरेलाई सिंगापुर जान भनेर झापाका डम्वर चौधरीलाई ६ लाख रकम बुझाए । उनलाई एकवर्ष अगाडि सिंगापुर पठाइदिने भन्दै मलेसियासम्म पुर्याएर नेपाल नै फर्काइयो । नेपाल फर्किए पछि घिमिरेले आफू ठगिएको भन्दै वैदेशिक रोजगार विभागमा उजुरी गरे । यस्तै काठमाडौं महानगरपालीका–६ का पेमा डिकी शेर्पालाई जापान पठाइदिने भन्दै पुस्पलाल निर्मल श्रेष्ठले १६ लाख २० हजार रुपैयाँ लिए । तर, पैसा लिएको महिनौं बितिसक्दा पनि जापान नपठाएपछि गत मंसिर १५ गते विभागमा उजुरी दिएका छन् ।

विदेश पठाउन भन्दै साउनदेखि पुससम्म १६१ वटा व्यक्तिगत ठगिको उजुरी विभागमा परेको छ । पीडितले साउनदेखि पुससम्म मात्रै १५ करोड ३३ लाख ७५ हजार ८१ रुपैयाँ माग दावीसहित उजुरी दिएका छन् । जसमध्ये ५८ जनाले १० करोड ५४ लाख २९ हजार ५०० रकम विगो दावीसहित अदालतमा मुद्दा दायर भएको छ ।

यस्तै गत माघ माहिनामा मात्रै ४ करोड ३६ लाख २० हजार रुपैयाँको दावीसहित विभागमा ६३ वटा उजुरी परेका छन् । जसमध्ये ६ जनाले ९ करोड ४४ लाख विगो दावीसहित अदालतमा मुद्दा दायर गरेका छन् । साउनदेखि माघ मसान्तसम्ममा २२४ जनाले १९ करोड ६९ लाख ९५ हजार रुपैयाँ दावीसहित विभागमा उजुरी परेका छन् । जसमध्ये ११ करोड ४८ लाख ६९ हजार ५ सय दावीसहित अदालतमा मुद्दा परेको छ ।

मंसिरदेखि यता विभागले ३१ वटा मेनपावरमा विभागको अनुगमन शाखाले अनुगमन गरेको छ । जसमध्ये ६ वटा मेनपावरमा मात्रै केही नभेटिएको विभागले जनाएको छ । अनुगमन भएका मध्ये ७ वटा मेनपावर जरिवानामा परेका छन् । १३ वटा वटा मेनपावरको कारोबार रोक्का भएका छन् । मंसिरदेखि यता ४ वटा कम्पनीको कारोबार फुकुवा भएको विभागले जनाएको छ ।

कोरोनाको खोप सुरु भएसँगै युवा विदेश जानका लागि मेनपावर र दलालको सम्पर्कमा पुग्ने गरेका छन् । विदेश पठाइदिन्छु भन्दै मोटो रकम लिएर विदेश नपठाउने, अलपत्र पार्नेहरुलाई विभागले अनुगमन गर्दै आएको छ ।

विभागको कारबाहीले मेनपावर व्यवसायी रुष्ट
विभागले मेनपावर कार्यालयहरुमा छापा हान्ने क्रम बढाएसँगै रुष्ट बनेका व्यवसायीहरु केही समय अगाडि महानिर्देशको कार्यकक्षमै पुगेर विरोध जनाएका थिए । छापा हान्नुभन्दा अगाडि व्यावसायी संघलाई सोध्नु पर्नेदेखि वैदेशिक रोजगार ऐन २०६४ समय सापेक्ष परिवर्तन गर्नु पर्ने मागसहित २१ बुँदे माग राखेका छन् । हालसम्म व्यावसायीको समस्या समाधानको लागि छुट्टै समिति बने पनि माग सम्वोधन हुन सकेको छैन ।