काठमाडौं । नयाँ सत्ता समीकरणको कसरतमा जुटेका दलहरु पछिल्लो समय भेटघाट तथा छलफलमा व्यस्त हुन थालेका छन् । विशेषगरी प्रधानमन्त्री केपी शर्मा ओलीले आफ्नो सत्ता टिकाइराख्ने रणनीति लिएका छन् भने त्यसमा जसपा ‘निर्णायक’ भूमिकामा देखिएको छ । यहीबीचमा ओलीबाहेकको नेतृत्वमा सरकार बनाउन पनि काँग्रेस, माओवादी केन्द्र र जसपाबीच समेत निरन्तर छलफल हुँदै आएको छ ।
सोही क्रममा जनता समाजवादी पार्टी नेपालका नेताहरुले बिहीबार आफ्नो दौडधुपलाई तीव्र तुल्याएका छन् ।बिहीबार नै पदाधिकारी बैठकमार्फत राजनीतिक दलहरुसँग विकसित परिस्थितिबारे उच्च तहमा भेटवार्ता र छलफल गर्ने निर्णय गरेको जनता समाजवादी पार्टीले सत्ता समीकरणका सन्दर्भमा दुई विपरीत ध्रुवसँग छलफल गरेको हो ।
स्रोतका अनुसार जनता समाजवादी पार्टी (जसपा) का नेताहरु उपेन्द्र यादव र डा. बाबुराम भट्टराईले काँग्रेस सभापति शेरबहादुर देउवासँग बिहीबार छलफल गरेका छन् । प्रतिनिधिसभा विघटनपछिको परिस्थितिमा दुवै दलले प्रधानमन्त्री केपी शर्मा ओलीको ‘असंवैधानिक’ कदमको विरोध गरेका कारण पनि दुवै दलले ओली सरकारको विकल्पमा साझा पहल गर्नुपर्ने सन्दर्भमा जसपाका नेताले देउवासँग प्रस्ताव गरेको बताइन्छ । यद्यपि छलफलबाट ठोस कुनै सहमति भने नभएको बताइएको छ ।
लगत्तै उपेन्द्र यादवसहितका जसपाका शीर्ष नेताहरु प्रधानमन्त्री ओलीसँग छलफलका लागि बालुवाटार पुगेका थिए । प्रधानमन्त्रीसँगको छलफलमा जसपा संघीय परिषद् अध्यक्ष डा. बाबुराम भट्टराई भने सहभागी भएनन् । उनी स्वास्थ्यको कारण देखाएर बालुवाटार नगएको स्रोत बताउँछ ।
प्रधानमन्त्रीसँगको छलफलमा भने उपेन्द्र यादवका अतिरिक्त जसपाका नेताहरु महन्थ ठाकुर, राजेन्द्र महतो, अशोक राई, लक्ष्मणलाल कर्ण बालुवाटार गएका थिए ।
प्रधानमन्त्री ओलीसँगको छलफल सकारात्मक भएको जनाइए पनि ठोस सहमति भने नजुटेको स्रोत बताउँछ । जसपाले प्रधानमन्त्री ओलीसँग थप छलफल गरिने जनाएको छ ।
