नेप्सेमा लगातारको वृद्धिसँगै बजार पुँजीकरण पनि २० खर्ब नजिक पुगेको छ । नेप्से पनि गत फागुन यताको उच्च बिन्दुमा पुगेको हो । बैंकिङ प्रणालीमा पर्याप्त तरलता हुनुको साथै बैंकहरुले धमाधम एकल अंकको ब्याजदरमा सेयर कर्जा दिँदा प्रदान गरीरहेका छन् । अर्कोतर्फ व्यापार व्यवसाय ठप्प हुँदा व्यापारीहरुले पनि लगानीको विकल्पको रुपमा सेयर बजारलाई रोज्दा बजार परिसूचकसँगै बजारमा लगातार उच्च कारोबार समेत हुँदै आएको छ ।
बजार परिसूचकसँगै यो साता कारोबार रकम पनि उल्लेख्य देखिएको छ । सातामा ४ दिन मात्रै कारोबार भएको सेयर बजारमा ११ अर्ब ९० करोड माथिको कारोबार भएको छ । यसलाई आधार मान्दा प्रतिदिन औसत करिब ३ अर्बको कारोबार भएको देखिन्छ । गत साता १४५८.०४ अंकमा बन्द भएको नेप्से १५१०.४२ अंकमा बन्द भएको छ । नेप्सेमा बढेसँगे बजार पुँजीकरण पनि करिब २० खर्बको नजिक पुगेको छ । साताको अन्तिम दिन बिहीबार बजार बन्द हुँदा पूँजीकरण १९ खर्ब ९८ अर्ब ३१ करोड पुगेको छ ।
कतिपय लगानीकर्ताले सेयर बजारमा देखिएको उत्साहलाई ‘अर्थमन्त्री फ्याक्टर’को रुपमा पनि अर्थ्याएका छन् । सेयरप्रति अनुदारको ट्याग लागेको अर्थमन्त्री युवराज खतितवडा बाहिरिने निश्चित भएकोले पनि बजारमा उत्साह देखिएको लगानीकर्ताहरुको दाबी छ । राष्ट्रियसभा सदस्यको दुई वर्ष कार्यकाल गत फागुनमा नै सकिएका अर्थमन्त्री खतिवडालाई थप ६ महिना मन्त्री बन्ने समयावधि थप गरिएको थियो । सांसद सदस्य बिना पनि ६ महिनासम्म बन्त्री बन्न सक्ने संवैधानिक व्यवस्था अनुसार मन्त्री बनेका खतिवडाको ६ महिना पूरा भएको छ । रिक्त रहेको राष्ट्रिय सभा सदस्यमा नेकपाले उपाध्यक्ष बामदेव गौतमलाई सिफारिस गर्ने निर्णय गरेसँगै शुक्रबार साँझ खतिवडाले मन्त्री पदबाट राजीनमा दिएका हुन् । अर्थमन्त्रीबाट खतिवडा बाहिरिने निश्चित भएकोले पनि सेयर बजार बढेको लगानीकर्ताहरुको दाबी छ ।
नेपाल पुनर्बिमा कम्पनीको मात्रै डेढ अर्बभन्दा बढीको कारोबार
साताभर बढेको बजारलाई नेपाल पुनर्बिमा कम्पनीले नेतृत्व गरेको छ । यो साता कम्पनीको सेयर मात्रै १ अर्ब ७२ करोड १६ लाखको कारोबार भएको छ । यो साता र अघिल्लो साता कम्पनीको सेयर मूल्यमा भएको लगातारको वृद्धिसँगै कम्पनी बजार पुँजीकरणमा दोस्रो स्थानमा उक्लिएको छ ।
एक खर्ब ८ अर्ब ३० करोड बजार पुँजीकरणमा सहित नेपाल दुरसञ्चार कम्पनी पहिलो स्थानमा छ भने दोस्रो स्थानमा रहेको नेपाल पुनर्बिमा कम्पनीको बजार पुँजीकरण ८८ अर्ब ९० करोड रहेको छ । गत साता कम्पनी बजार पूँजीकरणमा तेस्रो स्थानमा रहेके थियो ।
कम्पनीले बजार पुँजीकरणमा नबिल बैंक र नेपाल लाइफ इन्स्योरेन्सलाई पछाडि धकेलेको हो । कारोबार रकममा नेपाल पुनर्बिमापछि नेको इन्स्योरेन्स, नेपाल लाइफ, शिवम् सिमेन्ट, शिखर इन्स्योरेन्स शीर्ष ५ कम्पनीमा रहेका छन् ।
यता बजार पुँजीकरणमा शीर्ष १० कम्पनीमा तेस्रो स्थानमा नबिल बैंक, चौथौ स्थानमा नेपाल लाइफ इन्स्योरेन्स, एभरेष्ट बैंक, नेपाल इन्भेष्टमेन्ट बैंक, एनएमबी बैंक, एनआइसी एशिया बैंक, स्टान्डर्ड चाटर्ड बैंक र हिमालयन बैंक रहेका छन्
