जनकपुरधाम | धनुषाको नगराईन नगरपालिकामा राहतको नाममा खाद्यान्न सामग्रीको सट्टा नगद रकम वितरण गरिएको छ ।

लकडाउनका कारण समस्यामा परेका दैनिक ज्यालादारी र मजदुरी गर्ने व्यक्तिहरुलाई प्रदेश सरकारले खाद्यान्न सामग्री वितरण गर्न दिएको निर्देशन विपरित सो नगरपालिकाको वडा नम्बर–८ मा राहतको नाममा नगद वितरण गरिएको हो ।

यता राहत स्वरुप वितरण गरिएको नगदमा भेदभाव भएको स्थानीयले आरोप लगाएका छन् । सरकारी जागिर गर्ने व्यक्तिहरुलाई समेत राहत बाँडिएको तर गरिब विपन्न परिवारलाई राहत नदिइएको स्थानीय विमल कुमार मण्डलले आरोप लगाए । उनले लकडाउन भएदेखि आफु घरमै रहेपनि आफुलाई राहत नदिइएको बताए ।

उनले भने– ‘राहत वितरणको लागि तयारी गरिएको लिस्टमा मेरो नाम नरहेकोले मलाई राहत दिइएन् । म जस्ता कयौँलाई राहत दिइएको छैन् ।’ सब कन्डक्टरको रुपमा काम गर्दै आएका मण्डल लकडाउन भएदेखि घरमै बन्द छन् ।

त्यस्तै सब कन्डक्टरकै रुपमा काम गर्दै आएका विपिन कुमार यादवले आफुले पनि कुनै राहत नपाएको गुनासो पोखे । पाँच जना सदस्य रहेको परिवारमा लकडाउन भएदेखिनै काम बन्द भएपनि वडाबाट आफ्नो नाम राहत लिस्टमा समावेश नगरिएको उनले बताए ।

त्यस्तै स्थानीय विनोद कुमार यादवले राहत वितरणको लागि लिस्ट बनाउँदा समेत वडाध्यक्ष संजय राउतले आफुहरुसँग कुनै सरसल्लाह नलिएको अरोप लगाए ।

उनले भने–‘हामीलाई राहत वितरणको बारेमा कुनै जानकारी थिएन । गाउँलेले फोन गरेर भन्दा थाहा पाएँ ।’ मास्क र साबुन दिने समयमा सबै गरिब विपन्न परिवारलाई दिएपनि अहिले नगद बाँड्ने समयमा धेरैलाई छाडिएको उनले आरोप लगाए ।

वडाध्यक्ष राउतले राहतमा कुनै किसिमको भेदभाव नभएको दाबी गरेका छन् । उनले आफ्नो वडामा राहतको लिस्टमा कुनै किसिमको भेदभाव नभएको बताए । आफ्नो वडामा ९ लाख ७५ हजार रुपैयाँको राहत नगरपालिकाको तर्फबाट आएकोमा ६ सय ५० घर परिवारलाई राहत वितरण गरिएको बताए ।

उनले आफ्नो वडामा प्रति परिवार १ हजार ५ सय रुपैयाँ राहत स्वरुप दिएका छन् । वडाको तर्फबाट १५ केजी चामलको लागि ६३० रुपैयाँ, २ केजी दालको लागि २४०, १ लिटर तेलको लागि २००, २ केजी आलुको लागि ९०, १ केजी प्याजको लागि ५०, एक प्याकेट नुनको लागि २०, लुगा धुने २ वटा सावुनको लागि ६० रुपैयाँ र अन्य सामानको लागि २१० गरी १ हजार ५ सय रुपैयाँ राहत स्वरुप बाँडिएको हो ।

विभिन्न स्थानमा राहत वितरण हुँदा सडेको चामल लगायत खराब खाद्यान्न सामग्री बाँडिएको अरोप लागिरहेकोले आफुहरु खाद्यान्नको ठाउँमा नगद नै वितरण गरेको वडाध्यक्ष राउतले बताए ।thenepaltop