बीरगन्ज | बीरगंज नगरमा खुल्ला तथा दुर्गन्धित ठाँउमा माछा–मासुको बिक्री वितरणले उपभोक्ता अस्वस्थ्यकर माछामासु खान बाध्य भएका छन् । माछामासु बिक्रीवितरण गर्ने ठाउँको सरसफाई तथा व्यवस्थापनको विषय पटक–पटक उठ्ने गरेको भएपनि सरोकारवालाको उदासिनता तथा बेवास्ताले गर्दा उपभोक्तामा स्वास्थ्यको संक्रमणको खतरा देखिएको छ । उपभोक्तावादी संघसंस्था पनि यस विषयमा चुप्पी साँधेर बसेका छन् ।

यसै विषय सम्बन्धमा सरोकारवाला निकायहरु बीच गत फागुन १८ गते बसेको बैठकले विभिन्न निर्णयहरु गरेको भए पनि निर्णय कार्यन्वयन र नियमनतर्फ कसैको पनि चासो देखिएको छैन । पर्साका प्रमुख जिल्ला अधिकारी विष्णु कुमार कार्कीको अध्यक्षतामा सरोकारवालाहरुको उपस्थितिमा बसेको बैठकले महानगरसहित जिल्लामा सञ्चालित माछा मासु पसल व्यवस्थापन सम्बन्धी विभिन्न निर्णयहरु गरेको भएपनि माछामासु व्यवसायीले निर्णय लत्याएका छन् ।

बैठकले खुल्ला स्थानमा अस्वस्थ्यकर तरिकाले माछामासु बिक्रीवितरणले उपभोक्तामा गम्भीर समस्या सिर्जना भएकाले सो को व्यवस्थापनका लागि १५ दिनको समय दिएको थियो । त्यस्तै, बैठकले तोकिएको समय अवधि भित्र माछामासु पसल व्यवस्थापनका लागि सरोकारवालाबीच जनचेतनाका लागि प्रचारप्रसार गर्ने निर्णय गरेको थियो । त्यसैगरी, दिइएको समय अवधि पश्चात पनि अटेर गरी खुल्ला स्थानमा अस्वस्थ्यकर तरिकाले माछामासु विक्रीवितरण भए नभएको अनुगमन गर्न बीरगंज महानगरपालिकाको नेतृत्वमा व्यवसायीको प्रतिनिधि सम्मिलित टोलीले संयुक्त अनुगमन गर्ने र मापदण्ड विपरीत कार्य गर्नेलाई कानुन बमोजिम कारवाही गर्ने निर्णय गरेको छ ।

यस्तै, माछामासु विक्रीवितरणबाट निस्किएको फोहोर व्यवसायी आफैले व्यवस्थापन गर्नुपर्ने पनि निर्णय भएको छ । यसैगरी, सो बैठकले माछामासु विक्रीवितरणलाई मापदण्ड योग्य बनाउन बधशाला घर लगायतका पूर्वाधार निर्माणका लागि महानगरपालिकालाई अनुरोध गर्ने सहित मुल्य निर्धारण तथा नियन्त्रण गर्ने सम्बन्धमा वाणिज्य कार्यालयको संयोजनमा सरोकारवाला सम्मिलित समितिको सिफारिस गर्ने निर्णय भएको छ ।

तर दिइएको समय अवधि घर्किनै लाग्दा समेत माछामासु व्यवसायीले निर्णयहरु कार्यन्वयन गर्नु साटो निर्णय लत्याएकै छन्, अग्रसरता लिनुपर्ने निकाय पनि कानमा तेल हालेर बसेका छन् । हरेक पल्ट चाडपर्व नजिकिएसँगै उपभोक्ता हितका लागि विभिन्न निर्णय हुने गरेको र चाडपर्व सकिए पश्चात यी सबै विषय सेलाएर जाने गरेको बीरगंज महानगरपालिका वडा नं. १५ का उपभोक्ता सुनिल साहले गुनासो गर्नुभयो । अहिले पनि व्यवसायीले खुल्ला स्थानमा अस्वस्थ्यकर तरिकाले माछामासु विक्रीवितरण गरिरहेको अर्का उपभोक्ता किरण उदासले बताउनुभयो । साथै, बधशाला स्थल फोहोर रहने र विक्रीवितरण गर्ने ठाउँमा पनि त्यसै किसिमको लापरवाही भइरहेको उपभोक्ताहरु बताउँछन् । यस्तै, माछामासु पसलबाट निस्केका फोहोर पनि जथाभावी रुपमा फ्याँकिने गरेको पाइएको छ ।

यसैबीच, बैठकले दिएको समय अवधि सकिन लागेको हुदाँ अब अनुगमन कार्यलाई अघि बढाइने पर्साका सहायक प्रमुख जिल्ला अधिकारी ललित कुमार बस्नेतले बताउनुभयो । नेपाल पोष्ट डेलीसँग कुराकानी गर्दै बस्नेतले चैत्र ३ गते यस विषयमा थप छलफल गर्न सरोकारवालाहरुको बैठक बोलाइएको जानकारी दिनुभयो । चैत्र ३ गते बस्ने बैठकमा निर्णय कार्यन्वयन नगर्ने र मापदण्ड विपरीत कार्य गर्ने व्यवसायीहरुलाई कारवाही गर्ने सम्बन्धमा छलफल भई कारवाही प्रक्रिया अघि बढाइने उहाँको भनाई छ ।