टि२० आईमा शतक प्रहार गर्ने कप्तान पारस र ज्ञानेन्द्र मात्रै!
वीरगंज संजाल
Dec 30, 2019, 1:44 pm
५२७७
एजेन्सी | सन् २०१९ टि ट्वान्टी अन्तर्राष्ट्रिय क्रिकेट (आई) मा कप्तानको रुपमा शतक प्रहार गर्ने मात्रै दुई कप्तान रहेका छन् । दुवै कप्तान नेपालका पारस खड्का र ज्ञानेन्द्र मल्ल रहेका छन् । त्यस्तै ज्ञानेन्द्र यस वर्ष टि ट्वान्टी आईमा कप्तानको रुपमा एकै इनिङमा सर्वाधिक रन बनाउने खेलाडी बनेका छन् ।
उनले पूर्वकप्तान पारस खड्का, भारतीय कप्तान विराट कोहली र नेदरल्यान्डका कप्तान पिटर सीलारलाई पछि पारेका हुन् । सन् २०१९ मा टि ट्वान्टी आईमा एकै खेलमा सर्वाधिक रन बनाउने खेलाडी अफगानिस्तानका ओपनर हज्रतुल्लाह जजाई छन् । उनले फेब्रअरीमा आयरल्यान्डविरुद्ध १ सय ६२ रनको अविजित इनिङ खेलेका थिए ।
ज्ञानेन्द्रले अघिल्लो महिना १२ औं दक्षिण एसियाली खेलकुद (साग) टि ट्वान्टी मा कीर्तिपुर क्रिकेट मैदानमा भुटानविरुद्ध ५५ बलमा ५ चौका र ९ छक्का सहित १ सय ७ रन जोडेका थिए । जुन कप्तानका रुपमा २०१९ मा एकै खेलमा जोडेको सर्वाधिक रन हो । त्यसपछि पारस खड्काले गत सेप्टेम्बरमा त्रिकोणात्मक सिरिज अन्तर्गत सिंगापुरविरुद्ध ५२ बलमा ७ चौका र ९ छक्का सहित १ सय ६ रनमा अविजित रहेका थिए ।
सन् २०१९ मा टि ट्वान्टी आईमा कुल १९ शतक प्रहार भएका छन् । जसमा दुई कप्तानको मात्रै शतक रहेको छ । र दुबै नेपालका कप्तान रहेका छन् । पारस र ज्ञानेन्द्रले मात्रै २०१९ मा कप्तानको रुपमा शतक प्रहार गरेका हुन् ।
कप्तानको रुपमा पारस र ज्ञानेन्द्रलाई छाड्दा गत सेप्टेम्बरमा नेदरल्यान्डका कप्तान पिटर सीलारले स्कटल्यान्डविरुद्ध ९६ रनमा अविजित रहेका थिए । त्यस्तै एक हप्ता अघि भारतीय कप्तान विराट कोहलीले वेस्ट इन्डिजविरुद्ध ९४ रन जोडेका थिए ।
२०१९ मा टि ट्वान्टी आईमा एकै इनिङमा सर्वाधिक रन बनाउने खेलाडी:
हज्रतुल्ला जजाई (अफगानिस्तान) – आयरल्यान्डविरुद्ध १ सय ६२ रनमा अविजित
जर्ज मुन्से (स्कटल्यान्ड ) – नेदरल्यान्डविरुद्ध १ सय २७ रनमा अविजित
केभिन ओ ब्रायन (आयरल्यान्ड) – हङकङविरुद्ध १ सय २४ रन
ग्लेन म्याक्सवेल (अष्ट्रेलिया) – भारतविरुद्ध १ सय १३ रनमा अविजित
बिलाल जाल्मी (अष्ट्रिया) – चेक रिपब्लिकविरुद्ध १ सय ११ रनमा अविजित
टोनी उरा (पप्पुवा न्युगिनी) – फिलिपिन्सविरुद्ध १ सय ७ रनमा अविजित
ज्ञानेन्द्र मल्ल (नेपाल) – भुटानविरुद्ध १ सय ७ रन
पारस खड्का (नेपाल) – सिंगापुरविरुद्ध १ सय ६ रनमा अविजित
