सडक फराकिलो गर्ने कार्य मङ्सिर १० गतेसम्मको लागि टर्यो
वीरगंज संजाल
२४ कार्तिक २०७६, आईतवार २३:२६
१०२०५
वीरगंज | वीरगंजको मेनरोड फराकिलो गर्ने विषयमा सर्वोच्च अदालतमा परेको रीटमाथि आज पनि मुद्दा पेशीमा चढेन । सर्वोच्च अदालतका न्यायाधीशको अनुपस्थितिमा कात्तिक ४ गतेको मुद्दाको पेशी कात्तिक २४ गतेको लागि सारिएको थियो ।
सर्वोच्च अदालतमा वीरगंजको मेनरोडका करीब ४३ जनाले मुआवजा माग गर्दै सर्वोच्चमा असोज ७ गते दिएको रीटमाथि अदालतले असोज ८ गते अर्को आदेश नहुन्जेलसम्म अल्पकालीन अन्तरिम आदेश जारी गरेको थियो ।
अल्पकालीन अन्तरिम आदेशको सन्दर्भमा दुवै पक्षलाई कात्तिक ४ गते डाँकिएको र मुद्दा लम्बिंदै अब मङ्सिर १० गतेलाई सरेको छ । अदालतको आदेशको कारण वीरगंजको मेनरोड फराकिलो गर्ने विषयमा व्यापारिक मार्ग योजना (वीरगंज–पथलैया)ले काम अगाडि बढाउन सकेको छैन । आयोजनाले छठपछि सडक फराकिलो गर्ने भनेर सूचना जारी गरेको थियो ।
सूचनापछि योजनाले सडक फराकिलो गर्नको लागि वीरगंज क्षेत्रमा लागत राख्ने, नापजोख गर्ने कार्य शुरू गरेको थियो तर समितिका पदाधिकारीहरूले सो कार्यमा अवरोध गरेको र सर्वोच्चमा मुद्दामा दिएपछि नापजोख र लगत राख्ने काम रोकिएको छ ।
आयोजनाका प्रमुख सञ्जय मिश्रले समितिका पदाधिकारी सदस्यहरूले नापजोखमा अवरोध पुर्याएको कारण लागत राख्ने र नापी गर्ने कार्य हाललाई स्थगित गरेको बताए । उनले अदालतको फैसलापछि कार्य अगाडि बढ्ने बताए ।
यता वीरगंज विकास सङ्घर्ष समितिको नाममा मेनरोड फराकिलो गर्न युवाहरूको दबाब जारी छ । उनीहरूले आज सिटी जुलुस निकालेर मेनरोड फराकिलो गर्न दबाब सिर्जना गरेका थिए ।pratic
