वीरगंज । किसानलाई कृषिमा यान्त्रिकरणतर्फ उत्प्रेरित गर्ने उद्देश्यले प्रधानमन्त्री कृषि आधुनिकीकरण परियोजनाको वीरगन्ज कार्यालयले उन्नत प्रविधि तथा कृषि यान्त्रिकरणसम्बन्धी ३ दिने तालिम आयोजना गरेको छ । आइतबारबाट सुरु भएको तालिम मंगलबार सम्पन्न भएको छ । तालिमको दोस्रो दिन सोमबार प्रशिक्षार्थीहरूलाई कृषि औजार अनुसन्धान केन्द्र रानीघाट वीरगन्जमा धान खेतीमा प्रयोग हुने कृषि उपकरणहरुबाट स्थलगत जानकारी गराइएको थियो ।

किसानलाई हिलोमा छरुवा धान रोप्ने ड्रक सिडर प्रविधि, चार पांग्रे ट्याक्टरबाट चलाइने सुख्खामा छरुवा धान खेती प्रविधि जिरो टिलेज सिड कम फर्टिलाइजर ड्रिल मेसिन, न्यूनतम जोताई प्रविधिबाट धान रोप्ने पावर टिलरबाट चल्ने चाइनिज सिडकम फर्टिलाइजर ड्रिल मेसिन र राइस ट्रान्सप्लान्टर प्रविधिको लागि बेर्ना तयार गर्ने प्रविधिबारे स्थलगत तालिम दिइएको थियो । साथै केन्द्रले हालसम्म विकास तथा सिफारिस गरेका कृषि यन्त्रबारे पनि किसानलाई अवगत गराइएको थियो । केन्द्र प्रमुख इन्जिनियर सचिनकुमार मिश्राले कृषि श्रमिकको बढ्दो अभाव र खेतीयोग्य जग्गाको उत्पादकत्व घट्दै गएको सन्दर्भमा कृषिमा यान्त्रिकरणको विकल्प नरहेको बताए । तालिममा सहभागी किसान र कृषि प्राविधिकलाई सैद्धान्तिकसँगै व्यावहारिक ज्ञानसमेत दिइएको तालिम आयोजक परियोजना कार्यालयका अधिकृत पुरुषोत्तम रौनियारले जानकारी दिए ।

उनले यस वर्षको रोपाइँ नजिकिएकाले पनि किसानलाई धान खेती प्रयोग हुने कृषि यन्त्रसम्बन्धी सैद्धान्तिक र व्यावहारिक ज्ञान दिने प्रयास गरिएको बताए । किसानले धान खेतीमा अझै पनि परम्परागत तरिका नै अपनाइरहेकाले उनीहरूलाई किसानमैत्री प्रविधि तथा यान्त्रिकरणतर्फ लग्ने प्रयासस्वरूप तालिम आयोजना गरिएको रौनियारले बताए । परियोजनाको धान जोन कार्यक्रममा सूचीकृत कृषक सहकारी संस्थामा आबद्ध २१ किसान र ५ प्राविधिक सहभागी छन् । तालिमकी प्रशिक्षार्थी सुनाखरी कृषि सहकारी संस्थाकी अध्यक्ष सरस्वती भट्टराईले तालिमले नयाँ–नयाँ आविष्कार गरिएका तथा भित्रिएका कृषि यन्त्र तथा प्रविधिबारे धेरै जानकारी पाइएको र यो जानकारी भविष्यमा आफूहरूलाई अत्यन्त उपयोगी हुने बताइन् ।