वीरगन्ज | वीरगन्जमा स्थापना भएको मधेस विश्वविद्यालयमा पठनपाठन सुरु गर्ने तयारी गरिएको छ। विश्वविद्यालयमा यसै शैक्षिक सत्रदेखि कानुन र जनप्रशासनको पठनपाठन गराउने तयारी गरिएको हो। विश्वविद्यालयको उद्घाटन भएको अहिले नौ महिना बितिसकेको छ। नौ महिनाको अवधिमा यहाँ विभिन्न किसिमका प्रशासनिक र भौतिक संरचना बनाउने कार्य चलिरहेको छ।यसका साथै यसै शैक्षिक सत्रदेखि कानुन र जनप्रशासन संकायको पठनपाठन सञ्चालन गर्ने गरि तयारी तीव्र पारिएको विश्वविद्यालयका उपकुलपति डा. दीपक शाक्यले जानकारी दिए ।

उनले सकेसम्म यसै शैक्षिक सत्रदेखि दुईवटा संकायको पठनपाठन सुरु गराउने तयारीस्वरूप काम अघि बढाइएको बताए। वीरगन्जस्थित नेसनल ट्रेडिङ परिसरमा ९ महिनापहिले मधेस विश्वविद्यालय स्थापना गरिएको थियो ।विश्वविद्यालयको उद्घाटन २०७९ साल भदौ २२ गते भएको थियो। विश्वविद्यालयले पठनपाठनको लागि वीरगन्जदेखि पर्साका ग्रामीण पालिकाहरूबाट जग्गा प्राप्त गर्ने प्रक्रिया अघि बढाएको छ। त्यसक्रममा पर्साको पकहामैनपुर गाउँपालिकाको सुरजाहास्थित कट्टीमठको २७ बिगाहा जग्गा प्राप्त पनि गरिसकेको छ।यस्तै, बहुदरमाई नगरपालिका–२ मा रहेको ३५ बिगाहा जग्गा, वीरगन्ज महानगरपालिकामा रहेको १८ बिगाहा ऐलानी जग्गा पनि मधेस विश्वविद्यालयको लागि प्राप्ति गर्ने प्रक्रियामा रहेको उपकुलपति शाक्यले जानकारी दिए।

विश्वविद्यालय सञ्चालनको लागि विभिन्न नियमहरू बनाउन जरुरी रहेकोले अहिले नियमहरू बनाएको उनले बताए।‘विश्वविद्यालय सञ्चालनको लागि आवश्यक पर्ने नियमहरू हामीले बनाइसकेका छौँ। भौतिक संरचनाको कमी थियो, अहिले त्यो पनि बनाउन लागि परेका छौँ। विश्वविद्यालयको लागि चाहिने जग्गाहरू स्थानीय तहसँग समन्वय गरी प्राप्त गर्ने कार्यहरू गरिराखेका छौँ’, उपकुलपति शाक्यले भने। विश्वविद्यालयको लागि आवश्यक शिक्षक कर्मचारी कार्यविधि २०७९, खर्च कार्यविधि निर्देशिका, २०७९ बनाएर पारित गरिसकिएको विश्वविद्यालयका रजिष्ट्रार विजयकुमार यादवले जानकारी दिए। उनले विश्वविद्यालयले यसै शैक्षिक सत्रदेखि कानुन र जनप्रशासनको पठनपाठन गराउन तयारी गरिएकोले समयअनुसार कार्य अघि बढाएको बताए ।