वीरगंज । जिल्ला प्रहरी कार्यलय पर्सामा ४ महिनामा २ सय १४ वटा घरेलु हिसांका उजुरी दर्ता भएका छन् । चालु आर्थिक वर्षको श्रावणदेखि कात्तिकसम्म २ सय १४ वटा घरेलु हिसांका उजुरी दर्ता भएका हुन् । जिल्ला प्रहरी कार्यालय पर्साले दिएको तथ्याङक अनुसार सबैभन्दा बढी चालु आर्थिक वर्षको श्रावण महिनामा ७० वटा उजुरी परेको छ भने भदौंमा ६०, असोजमा ४४ र कात्तिक ४० वटा उजुरी दर्ता भएका छन् ।
दर्ता भएका उजुरी मध्ये १ सय २९ वटा फछ्यौट भएको जिल्ला प्रहरी कार्यालय पर्साले जनाएको छ । उजुरी परेका ८५ वटा मुद्दाका निवेदकहरु दर्ता पछि सम्पर्कमा नै नआएको महिला, बालबालिका तथा जेष्ठ नागरिक सेवा केन्द्रकी प्रहरी निरीक्षक मनिषा लौडराीले जानकारी दिईन् । मधेश प्रदेशमा सबैभन्दा बढी महिला हिंसा पीडित पाईएको राष्ट्रिय मानव अधिकार आयोग मधेश प्रदेशकी उपनिर्देशक मन्जु खतिवडाले बताईन् ।महिलामाथि घर देखि लिएर राजनितिक क्षेत्र लगायत विभिन्न क्षेत्रमा पनि हिंसा भईरहेको खतिवडाको भनाई छ ।
तराई मधेशमा महिलालाई चुल्होचौकामा मात्रै सीमित राख्ने गरेको र उच्च शिक्षा हासिल गर्नु भन्दा उमेर नपुगी विवाह गरिदिने चलनले बढी महिला हिंसामा परेको खतिवडाको तर्क छ । शिक्षा हासिल गरेका महिलालाई पनि अवसर प्राप्तिमा अभिभावकबाट नै रोक लगाउँदा महिला बढी पीडित बनेको खतिवडाले बताईन् । बालविवाह र दाईजोका कारणले मानव अधिकारका उलङ्गघन मधेश प्रदेशमा बढी हुने गरेको उनले बताईन । बर्षमा एक पटक मात्रै जनचेतनाका कार्यक्रम गरेर नहुने भन्दै घरघरमा पुगेर जनचेतना जगाउन आवश्यक रहेको खतिवडाले जोड दिईन् ।
