वीरगन्ज । राष्ट्रपति विद्यादेवी भण्डारीले जलस्रोतको बहुआयामिक उपयोग गर्दै समृद्धिको मार्गमा अगाडि बढ्नुपर्नेमा जोड दिएकी छन् ।
शनिबार काठमाडौंको भृकुटीमण्डपमा हिमालयन हाइड्रो एक्स्पोको उद्घाटन गर्दै राष्ट्रपति भण्डारीले सीमापार प्रसारणलाइनमार्फत नेपालको बिजुली विदेशी बजारमा निर्यातका लागि काम भइरहेको भन्दै जलस्रोतको बहुआयामिक उपयोग गर्दै समृद्धिको मार्गमा अगाडि बढ्नुपर्नेमा जोड दिएकी हुन् ।
उनले नेपालको ऊर्जा क्षेत्रको विकास र विस्तारका लागि निजी क्षेत्रले निर्वाह गरेको भूमिकाको प्रसंशा गर्दै आगामी दिनमा अझै बढी महत्त्वपूर्ण भूमिका निर्वाह गर्ने विश्वास व्यक्त गरिन् ।
ऊर्जाको आन्तरिक रूपमा नै खपत बढाउँदै निर्यातको दिशामा केन्द्रित भएको भन्दै उनले ‘समृद्ध नेपाल, सुखी नेपाली’को संकल्प पूरा गर्ने दिशामा केन्द्रित हुन समेत आग्रह गरिन् । जलवायुअनुकूलन तथा हरियाली प्रवर्द्धनमा जोड दिनुपर्ने पनि बताइन् ।
राष्ट्रपति भण्डारीले साना र मझौला जलविद्युत् आयोजनामा लगानी गरेर उज्यालो गाउँ बनाउने अभियानलाई तीव्रता दिन पनि निजी क्षेत्रलाई आग्रह गरिन् ।
कार्यक्रममा स्वतन्त्र ऊर्जा उत्पादकहरूको संस्था नेपाल (इपान)का अध्यक्ष कृष्णप्रसाद आचार्यले ऊर्जा उद्यमीको खर्बौँको लगानी जोखिममा रहेको भन्दै सरकारले आवश्यक कदम चाल्नुपर्ने बताए । उनले अहिले वर्षायाममा बढी भएको विद्युत्को उपयोग गर्न खपत बढाउने र निर्यात बढाउने काममा सरकारको ध्यान जानुपर्ने धारणा राखे ।
जलविद्युत् क्षेत्रका नवीनतम प्रविधिको प्रदर्शनीदेखि त्यससँग सरोकार भएका सबै विषयवस्तुमा बहस तथा छलफल गर्ने उद्देश्यले एक्स्पोको आयोजना गरिएको हो । एक्स्पो तीन दिनसम्म सञ्चालन हुने बताइएको छ । हाइड्रोपावर निर्माता, हाइड्रोपावर सामान उत्पादक, डिजाइनर, सप्लायर, लगानीकर्तालगायत व्यक्तिको सहभागिता छ ।
