वीरगंज | पछिल्लो समय सरकारले इन्टरनेटलाई अत्यावश्यक सेवाको सूचीमा समावेश गरेको छ। सञ्चार सेवाका रुपमा अत्यावश्यक कायम गरिएको इन्टरनेटको अभिन्न अंग बन्न पुगेको छ मोबाइल फोन।डेढ वर्ष अघि २०७६ चैत देखि फैलिएको कोरोना महामारीपछि त मोबाइल फोन झनै महत्वपूर्ण बन्न पुगेको छ। कोभिड सर्ने भन्दै घर बाहिर निस्किन अप्ठ्यारो भएपछि विद्यार्थीका कक्षा समेत प्रायः अनलाइनमै सीमित हुन पुगे। त्यसपछि मोबाइल फोन झनै आवश्यक बन्न पुग्यो।र फलस्वरुप मोबाइल फोनको आयात अस्वाभाविक बढ्न पुगेको व्यवसायी बताउँछन्।

आर्थिक वर्ष २०७७–०७८मा ३६ अर्ब ९० करोड रुपैयाँ ४५ लाख ८४ हजार रुपैयाँ बराबरको ७० लाख ३० हजार ३६६ थान मोबाइल विभिन्न देशबाट आयात भएको भन्सार विभागको तथ्यांक छ। गत आर्थिक वर्ष २०७७–०७८मा ३६ अर्ब ९० करोड रुपैयाँ ४५ लाख ८४ हजार रुपैयाँ बराबरको ७० लाख ३० हजार ३६६ थान मोबाइल विभिन्न देशबाट आयात भएको भन्सार विभागको तथ्यांक छ। नेपाल मोबाइल व्यवसायी संघका अध्यक्ष पुरुषोत्तम बस्नेत वर्षभरिमा आयात हुने करिब करिब सबै मोबाइल बिक्री हुने गरेको बताउँछन्। ‘वर्षमा ७० लाख हाराहारी मोबाइल फोन बिक्री हुन्छ भन्ने हाम्रो विश्लेषण छ,’ अध्यक्ष बस्नेत भन्छन्, ‘वर्षभरिमा खपत हुने मोबाइलको ठूलो हिस्सा दसैं, तिहार लगायतका पर्वमा हुने गरेको छ।’

अध्यक्ष बस्नेतका अनुसार वर्षभरिमा खपत हुने मोबाइलको करिब एक तिहाइ मोबाइल दसैं, तिहार र छठ पर्वको अवसरमा हुने गरेको छ। गत वर्ष साउन र भदौमा मात्रै आयात भएको मोबाइलको तथ्यांकले पनि बस्नेतको भनाइलाई समर्थन गर्छ।भन्सार विभागको तथ्यांक अनुसार गत वर्ष दसैं अघि साउन र भदौमा मात्रै ७ अर्ब ९४ करोड २४ लाख ५९ हजार रुपैयाँ बराबरको मोबाइल विभिन्न देशबाट आयात भएको छ। सो रकम बराबरको ९ लाख ९५ हजार ५०० थान मोबाइल फोन आयात भएका विभागको तथ्यांक छ। त्यसबाहेक असोजमा आयात भएका मोबाइल समेत दसैं, तिहार र छठ पर्वको आसपासमा हुने गरेका बस्नेत बताउँछन्।

यस वर्ष झन् बढ्यो दसैंअघिको व्यापार

नेपाली बजारमा गत वर्षको दसैं अघिको तुलनामा यस वर्ष मोबाइल फोनको कारोबार झन बढेको तथ्यांकले देखाउँछ। भन्सार विभागका अनुसार चालु आर्थिक वर्ष २०७८–०७९को साउन र भदौमा मात्रै १० अर्ब ३६ करोड ३५ लाख ७६ हजार रुपैयाँ बराबरका १४ लाख ९८ हजार ७६५ थान मोबाइल फोन आयात भइसकेका छन्।असोजमा पनि आयात हुने क्रममा जारी रहेको व्यवसायीहरुको भनाई छ। ‘दसैं र तिहारमा नेपालीको बढी खर्च गर्ने बानी भएका कारण प्रायगरी यही मौसममा नेपालीले अत्यावश्यक वस्तु खरिद समेत गर्ने गरेका छन्,’ बस्नेत भन्छन्, ‘मोबाइल फोन खरिदमा विभिन्न ब्राण्डहरुले स्किम, अफरहरु ल्याए पनि त्यसले मान्यता राख्दैन।’

भन्सार विभागका अनुसार पछिल्लो समय दसैंअघिको मोबाइल फोनको कारोबार निरन्तर बढ्दै गइरहेको छ। तीन वर्षअघि २०७५ को दसैं भन्दा अघि साउन र भदौमा ३ अर्ब ८६ करोड ७५ लाख १० करोड रुपैयाँ बराबरका, ८ लाख ८१ हजार ४५३ थान मोबाइल फोन आयात भएका थिए।त्यस्तै आर्थिक वर्ष २०७६–०७७को साउन र भदौमा ५ अर्ब १० करोड ४६ लाख ३६ हजार रुपैयाँ बराबरको ११ लाख ४ हजार ५१७ थान मोबाइल फोन आयात भएका थिए। प्रत्येक वर्षको सोही अवधिलाई तुलना गर्दा यस वर्ष बढेर साउन र भदौमा मात्रै १० अर्ब रुपैयाँ भन्दा बढी पुगिसकेको छ।