वीरगन्ज । कोरोनाभाइरसको संक्रमणका कारण देशमा भएको निषेधाज्ञा र राजनीतिक सरगर्मीका कारण समय भएपनि नेपाल प्रहरीका प्रहरी नायब महानिरीक्षक (डीआईजी)हरूको सरुवा अल्झिएको छ ।सामान्यतया डीआईजी तथा प्रहरीमा इन्चार्ज सम्हाल्ने अधिकृतहरूको सरुवा १ वर्षमा हुने गर्छ तर कोरोना भाइरसको संक्रमण तथा राजनीतिक उतारचढावका कारण मन्त्रिपरिषद्को निर्णयबाट हुने डीआईजी सरुवा रोकिएको हो ।

सातै प्रदेशका प्रहरी प्रमुखहरू र केन्द्रीय अनुसन्धान ब्यूरो (सीआईबी)को कार्यकाल अवधि वैशाख ८ गते पुगे तापनि असार लागिसक्दा समेत सरुवा हुने सुरसार देखिँदैन् । त्यसो त मन्त्रिपरिषद्मा सिफारिश लैजाने गृहमन्त्रालय अहिले प्रधानमन्त्री मातहतमा छ । कोरोना महामारी र देशको राजनीतिक अवस्थाका कारण डीआईजीहरूको सरुवा ओझेलमा परेको प्रहरी अधिकारीहरू बताउँछन् ।

‘अहिले सबैको ध्यान राजनीतिमा छ । प्रहरीका डीआईजीको सरुवामा कसले ध्यान दिने,’ एक उच्च प्रहरी अधिकारीले लोकान्तरसँग भने, ‘त्यसमा पनि अहिले गृहमन्त्रालय प्रधानमन्त्री मातहत छ, ध्यान कसैको जाँदैन ।’समयमा सरुवा नहुँदा प्रहरीले गर्ने कार्यसम्पादनमा असर पर्ने ती अधिकारी बताउँछन् । ‘एकजना इञ्चार्ज भएको समय सकिँदा त्यो कार्यालयमा काममा लगाउने इफोर्ट लगाउन सक्दैन । उसको ध्यान अब सरुवा हुन्छ, अर्को ठाउँमा कसरी राम्रो गरेर देखाउने भन्नेतर्फ ध्यान जान्छ,’ ती अधिकारीले भने ।

प्रहरी प्रधान कार्यालय भने कोरोना भाइरसको संक्रमणको समयमा सरुवा गर्दा एक ठाउँबाट अर्को ठाउँमा संक्रमण फैलिन सक्ने र अर्को इन्चार्ज जान ढिलो हुँदा कोरोना नियन्त्रणमा असर पर्ने देखिएकाले संक्रमण कम भएपछि सरुवा हुँदा राम्रो हुने तर्क गर्छ ।कोरोना भाइरसको संक्रमण कम भएमा असारको दोस्रो सातासम्म सरुवा हुने गृहमन्त्रालय स्रोतको भनाइ छ ।प्रदेश र सीआईबीमा कुन–कुन डीआईजीको दौड ?सरुवा हुन केही ढिला भएपनि प्रदेश र सीआईबीमा सरुवा हुनका लागि अहिले डीआईजीहरूको दौडधुप देखिएको छ ।

बैतडीकी १६ वर्षीया किशोरी भागरथी भट्ट हत्या प्रकरणको सफल अनुसन्धान गरेका सुदूरपश्चिम प्रदेशका प्रहरी प्रमुख डीआईजी उत्तम सुवेदी र २ नम्बर प्रदेशका प्रमुख रहेका डीआईजी धिरजप्रताप सिंहको केन्द्रीय अनुसन्धान ब्यूरो (सीआईबी)मा आउने चर्चा छ ।

भने हाल सीआईबीका प्रमुख रहेका डीआईजी सहकुल थापा र दिवेश लोहनी २ नम्बर प्रदेशमा जान चाहेको स्रोत बताउँछ ।तर अहिले प्रहरी महानिरीक्षक –आईजीपी) र सरकारनिकट मानिएका सहकुल थापाले बाजी मार्ने प्रहरी अधिकारीको आकलन छ ।प्रदेश १ मा डीआईजी अरुण बीसी र बाग्मती प्रदेशमा प्रकाशजंग कार्कीको चर्चा छ ।

गण्डकी प्रदेशमा पुरुषोत्तम कँडेल, लुम्बिनी प्रदेशमा गणेश ऐर, कर्णाली प्रदेशमा प्रकाश अधिकारी, सुदूरपश्चिममा राजेशलाल कर्णको चर्चा अहिले प्रहरी प्रधान कार्यालयमा छ ।कोरोना संक्रमण र सरकारका कारण वरिष्ठ प्रहरी उपरीक्षक (एसएसपी)हरूको पनि सरुवा रोकिएको छ ।

एसएसपीहरूको सरुवा पनि मन्त्रिपरिषद्बाट नै हुने व्यवस्था छ ।
तर प्रहरी प्रधान कार्यालयले गर्न सक्ने प्रहरी उपरीक्षक (एसपी) र प्रहरी नायब उपरीक्षक (डीएसपी)हरूको सरुवा समेत रोकिएको छ ।
प्रहरी प्रधान कार्यालय स्रोतलाई मान्ने हो भने कोरानाकै कारणले एसपी र डीएसपीहरूको सरुवा हुन नसकेको हो । कतिपय डीएसपीहरूको १७ महिना पुग्दा समेत सरुवा हुन सकेको छैन ।