बारा | बाराको निजगढ नगरपालिका–९ बुद्धचोक नजिकैको एक घरभित्र मंगलवार बिहान भएको हत्या प्रकरणमा प्रहरीले एक जनालाई पक्राउ गरेको छ। निजगढ नगरपालिका वडा –९ का १९ वर्षीय रोहित शर्माको हत्यामा संलग्न आरोपमा मंगलवार दिउँसो ४ बजे प्रहरीले ती व्यक्तिलाई पक्राउ गरी सार्वजनिक गरेको हो।

रौतहट चन्द्रपुर नगरपालिका ४ का २९ वर्षीय अरुणकुमार साह हत्या अभियोगमा पक्राउ परेका हुन्। जिल्ला प्रहरी कार्यालय बाराले आयोजना गरेको पत्रकार सम्मेलनमा साहले रोहितको हत्या गरेको स्वीकारेको बाराका प्रहरी उपरिक्षक दिपेन्द्र शाहीले बताए। साहले धारिलो घरेलु हतियार चक्कु घाँटीमा प्रहार गरी शर्माको हत्या गरेको प्रहरी अनुसन्धानबाट खुलेको छ।

मृतक शर्मा र आफूले लागू औषध सेवन गर्ने गरेको र आपसी रिसीईबीका कारण आफूले नैं रोहितको हत्या गरेको अभियुक्त साहले स्वीकार गरी साविती बयान दिएको प्रहरी उपरीक्षक शाहीले बताए।

अभियुक्त साहलाई चन्द्रनिगाहपुर स्थित एक किराना पसलबाट घटना भएको ४ घण्टाभित्रै पक्राउ गर्न सफल भएको प्रहरीले जनायो। अभियुक्तले प्रहरी समक्ष मृतक रोहित र आफूबिच लागू औषध सेवन गर्ने क्रममा विवाद भई रहने, आफूलाई अपमानित गर्ने गरेको, पेस्तोलले हानी मारी दिने जस्ता धम्की दिने गरेकाले आफूले रोहितको हत्या गरेको स्वीकारेको अनुसन्धानबाट खुलेको प्रहरीले जनाएको छ।

हत्यामा प्रयोग गरिएका चक्कु र अभियुक्त साहले चढेर आएको ना १३ प ७२१२ नम्बरको मोटरसाइकलसमेत प्रहरीले जफत गरेको छ। उक्त मोटरसाइकल मृतकका दाजु रौतहट चन्द्रनिगाहपुर बस्ने राजकुमार शर्माको रहेको र ३ महिनादेखि अभियुक्त साहलाई चढ्न दिएको खुलेको बारा प्रहरी प्रवक्ता गौतम मिश्रले जानकारी दिए।