वीरगन्ज । सरकारले कोरोना परीक्षण र उपचारमा शुल्क तोकेपछि सरकारी अस्पतालका प्रयोगशालामा पीसीआर परीक्षण घट्दै गएको छ ।

सर्वसाधारणले ८ महिनायता सरकारी अस्पतालबाट निःशुल्क परीक्षण र उपचार पाउँदै आएकामा कात्तिक २ गतेबाट सरकारले यो सेवा कटौती गरेको थियो ।

यो निर्णयपछि संक्रमितको सम्पर्कमा आएका र सम्भावित संक्रमितले परीक्षण गर्नै छाडेका छन् । ७ दिनयता उपत्यकाका सरकारी अस्पतालको प्रयोगशालामा भएको परीक्षणको तथ्यांक हेर्दा क्रमिक रूपमा घट्दै गइरहेको देखिन्छ ।

कात्तिक ७ गतेमा टेकुस्थित सहिद शुक्रराज ट्रपिकल तथा सरुवा रोग अस्पतालमा ९ सय ३८ नमुनाको स्वाब परीक्षण भएको थियो । यो संख्या क्रमिक रूपमा घट्दै कात्तिक १७ मा आइपुग्दा १ सय ५८ मात्रै रहेको अस्पतालले जनाएको छ । परीक्षणका लागि सयौं मानिसको भीड लाग्ने यो अस्पताल परिसर हिजोआज सुनसान जस्तै बनेको छ ।

पीसीआर परीक्षण गर्दै आएका प्रसूति गृह, पाटन अस्पताल, वीर, त्रिवि शिक्षण, प्रहरी र सशस्त्र प्रहरी अस्पतालमा पनि पहिलेजस्तो पीसीआरका लागि भीड छैन । शुल्कै तिर्नुपरेपछि सहजै परीक्षण हुने भन्दै धेरैजसो सेवाग्राही निजी अस्पतालको प्रयोगशाला पुग्ने गरेका छन् । परीक्षणको तथ्यांकले पनि सरकारीभन्दा निजी प्रयोगशालामा धेरै पीसीआर भएको देखिन्छ ।

अहिले संक्रमण दर अत्यधिक बढेकाले कुनै पनि बहानामा परीक्षणको दायरा घट्नु जनस्वास्थ्यका लागि ठूलो चुनौती भएको सरुवा रोग विशेषज्ञ डा. शेरबहादुर पुन बताउँछन् । ‘परीक्षण खुम्चिँदा यसले समुदायमा संक्रमणदर त अझै तीव्र बनाउँछ नै मृत्युदर पनि बढ्छ । २ हप्तायताको तथ्यांक केलाउँदा मृत्युदर धेरै बढिसक्यो,’ उनले भने, ‘कन्ट्याक्ट ट्रेसिङमा परेका सबैको परीक्षण गर्ने र आइसोलेट गर्ने अभ्यासलाई निरन्तरता नदिने हो भने कोरोना संक्रमणकाल धेरै लम्बिन्छ ।’

सरकारी अस्पतालमा पीसीआर निःशुल्क हुँदा ५ पटकसम्म सेवा लिने एउटै व्यक्ति पनि भेटिन्थे । शुल्क लिन थालिएपछि यस्तो ‘दुरुपयोग’को अन्त्य भए पनि संक्रमित पहिचान नहुने र अन्ततः यसले जोखिम नै बढाउने डा. पुनको भनाइ छ । सरकारले नीति परिवर्तन गरेर भए पनि परीक्षणको दायरा बढाउनुपर्ने उनले सुझाए ।

अहिले परीक्षण थोरै तर संक्रमणदर धेरै भएकाले समुदायमा संक्रमण तीव्र भएको संकेत दिइरहेको जनस्वास्थ्यविद् डा. शरद वन्तले बताए । संक्रमण नघट्दै परीक्षण, आइसोलेसन र क्वारेन्टीन अभ्यास रोक्दा यसले भोलि नियन्त्रण नै गर्न नसक्ने खालको महामारीको रूप लिन सक्ने उनले चेतावनी दिए ।

‘अहिले परीक्षणको अवस्था हेर्दा संक्रमणदर २० प्रतिशतभन्दा बढी देखिन्छ, जुन हामीले अड्कल गरेभन्दा निकै धेरै हो,’ उनले भने, ‘यसको मलतब परीक्षण गर्न पुगेको छैन भन्नु नै हो । परीक्षणको दर समयभन्दा पहिले नै खुम्च्याइएको छ, यसले जोखिमबाहेक केही निम्त्याउँदैन ।’आर्थिक अभावको बहानामा सरकारले परीक्षणदर घटाउन नहुने र यस्तो नीति तुरुन्तै बदल्न उनले आग्रह समेत गरे । कान्तिपुर दैनिकमा खबर छ ।