वीरगञ्ज : पर्सा प्रहरीले ठोरी गाउँपालिकाबाट भरुवा बन्दुकसहित एक जना युवकलाई पक्राउ गरेको छ ।

प्रहरी चौकी सुवर्णपुरका प्रहरी टोलीले ठोरी गाउँपालिका वडा नम्बर ५ स्थित ओरिया पुलमा चेकजाँच गर्ने क्रममा २३ वर्षीय दिपेश पाख्रीनलाई भरुवा बन्दुकसहित पक्राउ गरेको हो ।

बिजयबस्तीबाट सुवर्णपुर तर्फ पैदल आउँदै गरेका पाख्रीनलाई चेकजाँच गर्दा उनको साथबाट १ थान भरुवा बन्दुक, सोमा लाग्ने गन्धक पाउडरको एउटा वट्टा र ८ थान रडका ससाना टुक्रा बरामद भएको प्रहरी नायब उपरीक्षक अनन्तराम शर्माले बताए ।

पक्राउ परेका पाख्रीनलाई जिल्ला प्रहरी कार्यालय वीरगन्ज ल्याइ थप अनुसन्धान गर्ने काम भइ रहेको प्रहरी नायब उपरीक्षक शर्माले बताए ।