चितवन । चितवनमा लकडाउन उल्लंघन गर्ने ५१ सवारी साधनसहित ७४ जनालाई प्रहरीले सोमबार नियन्त्रणमा लिएको छ ।

कोरोना भाइरस (कोभिड-१९) को रोकथाम तथा नियन्त्रण गर्न सरकारले लागू गरेको लकडाउन उल्लंघन गर्नेमा ७२ जना पुरुष र २ जना महिला रहेको चितवन प्रहरीले जनाएको छ ।

जिल्ला प्रहरी कार्यालय चितवनका अनुसार नियन्त्रणमा लिइएका सवारी साधानमा एक वटा कार, १८ वटा मोटरसाइकल, १२ वटा स्कुटी र २० वटा साइकल छन् ।

लकडाउन उल्लंघन गर्नेहरुलाई नियन्त्रणमा लिएर विभिन्न स्थानमा ‘होल्ड’ गरी सम्झाई-बुझाई घर पठाइएको चितवनका प्रहरी प्रवक्ता एवं डिएसपी एकनारायण कोइरालाले जानकारी दिए ।