बीरगन्ज | यस वर्षको माध्यमिक शिक्षा परीक्षामा (एसइई) पर्साबाट ८ हजार ५९ परीक्षार्थी सम्मिलित हुने भएका छन् । आगामी चैत ६ गतेदेखि सञ्चालन हुने परीक्षामा नियमिततर्फ ७ हजार ४ सय १२, एक्जाम्टेड र ग्रेडवृद्धितर्फ ५ सय ३ तथा प्राविधिकतर्फ १ सय ४४ जना परीक्षार्थीले परीक्षा दिन लागेको शिक्षा विकास तथा समन्वय इकाई पर्साका प्रमुख फत्त बहादुर श्रेष्ठले जानकारी दिए । एसइई परीक्षा २०७६ का लागि पर्सामा साविककै २४ वटा केन्द्रहरु कायम गरिएका छन् ।

२४ केन्द्रहरुमध्ये १३ वटा केन्द्र बीरगन्ज महानगरभित्र रहेका छन् भने बाँकी ११ वटा पर्साका अन्य स्थानीय तहहरुमा कायम गरिएका छन् । त्यस्तै, २४ वटा परीक्षा केन्द्रहरुमध्ये २३ वटा नियमित परीक्षार्थीका लागि कायम गरिएको र १ वटा केन्द्र एक्जाम्टेड तथा ग्रेडवृद्धि गर्न आवेदन दिएका परीक्षार्थीका लागि कायम गरिएको श्रेष्ठ ले जानकारी दिए ।

एसइई परीक्षाका लागि पर्सामा सम्पूर्ण तयारी पूरा भएको उहाँको भनाई छ । परीक्षाका लागि आवश्यक प्रश्नपत्र बाहेकका शैक्षिक सामाग्रीहरु केन्द्रहरुमा पु¥याउने काम भइरहेको र केन्द्राध्यक्षहरुको अभिमुखिकरणका लागि पनि तयारी भइरहेको उनले बताए । २४ वटा केन्द्राध्यक्षहरु बाहेक परीक्षाका लागि ५६ जना सह–केन्द्राध्यक्ष, ४ सय २ जना निरीक्षक, ७५ परीक्षा सहयोगी र १ सय ६४ जना कार्यालय सहयोगी नियुक्त गरिएको जानकारी प्राप्त भएको छ । यस्तै, यस वर्षको एसइईमा कारागारबाट ३ जना र बाल सुधार गृहबाट ६ जना परीक्षार्थी समेत सम्मिलित हुन लागेको शिक्षा विकास तथा समन्वय इकाई पर्साका प्रमुख श्रेष्ठले जानकारी दिए ।

यस्तै, कोरोनाको संक्रमणले गर्दा एसइई सर्न सक्ने हल्ला न्युन र निराधार भएको पनि उनले प्रस्ट पारे । बरु, परीक्षार्थीहरुको स्वास्थ्यलाई ध्यानमा राख्दै, एसइईका प्रत्येक केन्द्रहरुमा हेल्थ डेस्क स्थापना गर्ने तयारी भइरहेको प्रमुख श्रेष्ठले बताए ।

उता, बारा जिल्लाबाट यस वर्ष एसइई परीक्षामा ८ हजार १४ परीक्षार्थीहरु सम्मिलित हुने भएका छन् । बाराबाट परीक्षामा नियमिततर्फ ७ हजार ६ सय ८०, एक्जाम्टेड र ग्रेडवृद्धितर्फ ३ सय ३४ तथा प्राविधिकतर्फ २ सय ५ जना परीक्षार्थीले परीक्षा दिन लागेको बाराको शिक्षा विकास तथा समन्वय इकाईका परीक्षा शाखाका प्राविधिक सहायक सन्तोष शर्माले जानकारी दिए । बारा जिल्लामा एसइई परीक्षाका लागि ३२ वटा केन्द्र तोकिएको उनले जानकारी दिए । ३२ वटा केन्द्रहरुमध्ये ३१ वटा नियमित र १ वटा केन्द्र एक्जाम्टेड र ग्रेडवृद्धि परीक्षार्थीहरुका लागि तोकिएको जनाइएको छ ।

राष्ट्रिय परीक्षा बोर्डले जारी गरेको परीक्षा तालिका अनुसार चैत्र १७ गतेसम्म परीक्षा सञ्चालन हुनेछ । तालिका अनुसार पहिलो दिन अनिवार्य अंग्रेजी, ७ गते अनिवार्य नेपाली, ९ गते अनिवार्य गणित, १० गते विज्ञान र ११ गते अनिवार्य सामाजिक अध्ययनको परीक्षा हुनेछ । त्यस्तै, चैत १२ गते अनिवार्य स्वास्थ्य, जनसंख्या तथा वातावरण शिक्षा, १३ गते ऐच्छिक गािणत र परीक्षाको अन्तिम दिन १७ गते विभिन्न प्राविधिक विषयको परीक्षा तोकिएको छ । परीक्षा बिहान ८ बजेदेखि ११ बजेसम्म सञ्चालन हुनेछ ।