वीरगञ्ज । विश्वभर बढ्दै गइरहेका दमका बिरामीलाई लक्षित गर्दै नेशनल मेडिकल कलेज शिक्षण अस्पताल, वीरगञ्ज पर्साले आज विशेष जनचेतनामूलक कार्यक्रम सम्पन्न गरेको छ।
मानिसमा दमका कारण उत्पन्न समस्या र त्यसबाट बच्ने उपायका विषयमा जानकारी दिन आयोजित उक्त कार्यक्रममा विविध गतिविधिहरू समावेश गरिएका थिए। कार्यक्रममा नेशनल मेडिकल कलेजका प्रेस सल्लाहकार आसिक अन्सारीले दम सम्बन्धी जनचेतना फैलाउने उद्देश्यले कार्यक्रम आयोजना गरिएको जानकारी दिनुभयो।

उक्त कार्यक्रममा दम रोगको कारण, लक्षण र निवारणका उपायबारे जानकारी दिने विभिन्न पोस्टर र ब्यानरहरू प्रदर्शनी गरिएको थियो। यसै अवसरमा डा. सुधाकर झाको नेतृत्वमा दमका बिरामीको निःशुल्क स्वास्थ्य परीक्षणसमेत गरिएको थियो। डा. झाका अनुसार कार्यक्रमको अवसरमा रगत परीक्षणमा १५ प्रतिशत छुट पनि प्रदान गरिएको थियो।

दमका बिरामीलाई सहज बनाउनका लागि सुँघ्ने औषधि (इनहेलर) नि:शुल्क वितरण गरिएको थियो भने रोगीहरूका लागि फलफूल समेत वितरण गरिएको थियो। कार्यक्रममा सहभागीहरूलाई आफ्ना श्वासप्रश्वास प्रक्रियालाई बुझ्न सक्ने एउटा गेमिङ गतिविधि पनि सञ्चालन गरिएको थियो।
कार्यक्रमको मुख्य उद्देश्य रोगको उपचार मात्र नभइ रोग नलाग्ने उपायतर्फ समाजलाई जागरूक गराउनु रहेको कलेजका प्रबन्ध निर्देशक शहनवाज अन्सारीले बताउनुभयो।

सखुवा प्रसौनी गाउँपालिका–५, देरबनाकी १०२ वर्षीया वृद्धा महलुदन खातुनको समेत कार्यक्रममा निःशुल्क स्वास्थ्य परीक्षण गरिएको थियो।
कार्यक्रम नेशनल मेडिकल कलेज शिक्षण अस्पताल वीरगञ्ज र चेरिटेबल सोसाइटीका नरसिंह समूहका विद्यार्थीहरूको सहकार्यमा सम्पन्न भएको हो। कार्यक्रममा नेशनल मेडिकल कलेजका मार्केटिङ तथा एडमिसन डाइरेक्टर आविद हुसेन अन्सारी, अस्पताल निर्देशक इसरत जहाँ अन्सारी, कलेज निर्देशक रुवि श्रेष्ठ, यासमिन लगायतको उपस्थिति रहेको थियो।
यस कार्यक्रमले दमसम्बन्धी जनचेतना फैलाउनेमा महत्वपूर्ण योगदान पुर्‍याएको सहभागीहरूको भनाइ छ।