खोटाङ | खोटाङको बुवाखोलामा सोमबार राती निर्माणाधिन पक्की पुलको ढलान हुँदै थियो। ठेकेदार कम्पनीले पुलको ढलानको तयारी गरेपछि खोटाङका स्थानीय बासिन्दाले कोशी प्रदेशका भौतिक पूर्वाधार विकास मन्त्री भुपेन्द्र राइलाई पुलको अनुगमन गर्न जानकारी दिन्छन् । आफ्नै निर्वाचन क्षेत्रमा निर्माण भइरहेको पक्की पुलको निरीक्षणमा मन्त्री राई पूर्वाधार कार्यालयका इन्जिनियर र पत्रकारसहित रातको समयमा पुलको अनुगमन गर्न पुग्छन् ।

मन्त्री राई रातको समयमा विराटनगरदेखि ढलान भइरहेको पुलको अनुगमनमा पुगेपछि पुलमा स्टमेटअनुसार फलामको रडको सेटिङ र सिमेन्ट, बालुवा र गिट्टीको मात्रा पनि हेरे । राईले पुलको चारैतिर घुमेर निरीक्षण गरेपछि सम्झौता अनुसारको काम गरेको भन्दै निर्माण कम्पनीका ठेकेदार महेश रेग्मीलाई धन्यवाद दिँदै पुल निर्माणको काम समयमै सक्न पनि निर्देशन दिए। पक्की पुलको ढलान हुँदै गर्दा मन्त्री राईको अनुगमनले पुल निर्माणको काम बजबुत हुने पौवासेराकी कौसिला राइले बताइन् । कोशी प्रदेश सरकारको १७ करोड ५८ लाख ६९ हजार ७ सय रुपैयाँ लगानीमा खोटाङको बराहपोखरी गाउँपालिका-५ को पौवसेरा र जन्तेढुङगा गाउँपालिका-१ को बीचमा पर्ने बुवाखोलामा १४८ मिटर लम्बाईको पक्की पुल निर्माणाधीन अवस्थामा छ । खोटाङको दक्षिणी क्षेत्रका बराहपोखरी, जन्तेढुङ्गा र खोटेहाङ गाउँपालिकाका बसिन्दालाई तराइका जिल्ला सुनसरी मोरङ र झापा झर्न सहज हुनेछ । बुवखोलाको यो पुल र सुनकोशीको बंशिलाघाटको निर्माणाधीन पक्की पुल बने खोटाङका जातलाई प्रदेश राजधानी विराटनगर, धरान, इटहरी लगायतका स्थानमा छोटो दूरीको यात्रा तय हुने स्थानिय अर्जुन राईले बताए ।

पुल आगामी मंसिरसम्म निर्माण सम्पन्न गरि प्रदेश सरकारलाई हस्तान्तरण गरिने निर्माण कम्पनी जयबागेस्वरी रेग्मी चुलिया जेभीका प्रतिनिधि महेश रेग्मीले बताए। पुलको निर्माण अवधि २०८३ कात्तिक २१ गतेसम्म तोकिएको छ । बुवाखोलाको पुल बनेपछि बर्षातको समयमा पनि साना सवारी साधानको माध्यमबाट उदयपुरको बेलटार हुँदै धरान विराटनगर जान सजिलो हुने स्थानीय कुलबहादुर थापा बताउँछन्।