बारा । बारा जिल्लाको आदर्शकोटवाल गाउँपालिकामा २२५ किलो गाँजा सहित चार जना पुरुष पक्राउ परेका छन्। विशेष सूचनाको आधारमा २०८२ बैशाख २० गते राति करिब २ बजे इलाका प्रहरी कार्यालय बारागढीबाट प्रनानि कुसुम नायकको नेतृत्वमा खटिएको टोलीले वडा नं. ३ स्थित बाताराको एक खेतमा पार्किङ गरिएको प्र.२-०३-००१ त ४८७६ नम्बरको ट्याक्टर जाँच गर्दा फल्स बटम बनाई लुकाइएको अवस्थामा गाँजा फेला पारेको हो।

प्रहरीका अनुसार उक्त ट्याक्टरको ढालामुनि लुकाइछिपाइ राखिएको गाँजा १५ वटा कार्टुनमा प्याक गरिएको थियो, जसको कुल तौल २२५ किलो रहेको छ। सोही गाँजा ओसारपसारमा संलग्न रहेका चार जनालाई नियन्त्रणमा लिई आवश्यक कानूनी प्रक्रिया अघि बढाइएको प्रहरीले जनाएको छ।

पक्राउ पर्नेमा बारा जिल्लाको आदर्शकोटवाल गाउँपालिका वडा नं. ३ का करिब ३० वर्षीय ट्याक्टर चालक नन्दकिशोर मुखिया, मकवानपुर हेटौंडा उपमहानगरपालिका वडा नं. ४ का करिब २१ वर्षीय कमाण प्रजा, कैलाश गाउँपालिका वडा नं. ४ देवतिस बस्ने करिब २४ वर्षीय सिताराम प्रजा, र बकैया गाउँपालिका वडा नं. ५ छतिवन बस्ने करिब २२ वर्षीय नवराज मगर रहेका छन्।

प्रहरीले बरामद गाँजा र पक्राउ परेका व्यक्तिहरूलाई आवश्यक अनुसन्धान तथा कारबाहीका लागि प्रक्रिया अघि बढाएको छ।