वीरगञ्ज । भारतको कश्मीरस्थित पहलगाममा भएको आतंकवादी आक्रमणको विरोधमा राष्ट्रिय एकता अभियानद्वारा बिहीबार निकालिएको विरोध रयालीमा प्रहरीले हस्तक्षेप गरेको छ। बाराको सिमरादेखि सुरु भएको विरोध रयालीलाई पर्साको वीरगञ्जतर्फ आउँदै गर्दा जितपुरमा प्रहरीले अवरोध गरेको अभियानका अध्यक्ष विनय यादवले जानकारी दिएका छन्।

यद्यपि प्रहरीको अवरोधका बाबजुद रयाली वीरगञ्ज पुगेर प्रदर्शन गर्न सफल भएको यादवले बताएका छन्। जितपुरमा भएको हस्तक्षेपप्रति गम्भीर आपत्ति जनाउँदै अभियानले प्रेस विज्ञप्ति जारी गरेको छ। विज्ञप्तिमा भनिएको छ, “हाम्रो प्रदर्शन पूर्णतः शान्तिपूर्ण थियो, जसको उद्देश्य पहलगाममा ज्यान गुमाएका भारतीय सुरक्षाकर्मी, सर्वसाधारण र नेपाली नागरिक सुदीप न्यौपानेप्रति श्रद्धाञ्जली अर्पण गर्नु तथा आतंकवादविरुद्ध अन्तर्राष्ट्रिय जगतमा सशक्त सन्देश दिनु थियो।”

एकता अभियानले प्रशासनको कदमलाई अभिव्यक्ति स्वतन्त्रतामाथिको प्रहार, अलोकतान्त्रिक र अमानवीय व्यवहार भन्दै घोर निन्दा गरेको छ। साथै, सरकारले आतंकवादविरुद्ध स्पष्ट अडान लिनु पर्ने, अन्तर्राष्ट्रिय मञ्चहरूमा नेपालले आफ्नो धारणा प्रष्टसँग राख्नुपर्ने माग पनि राखिएको छ।

अभियानले वीरगञ्जका नागरिकहरूलाई आतंकवादविरुद्धको आवाजमा शान्तिपूर्ण ढंगले सहभागी हुन आह्वान समेत गरेको छ। अभियानका अनुसार यस्तो आन्दोलनले केवल भावनात्मक ऐक्यबद्धता मात्र होइन, आतंकवादविरुद्धको साझा चेतना निर्माणमा समेत योगदान पुग्नेछ।