काठमाडौं । निजी मोबाइल सेवाप्रदायक कम्पनी एनसेलले पछिल्लो चार महिनादेखि लगातार रूपमा ग्राहक गुमाउँदै गइरहेको पाइएको छ । गत कात्तिकपछिका हरेक महिनामा कम्पनीका ग्राहक लगातार घट्न थालेका हुन् ।

नियामक नेपाल दूरसञ्चार प्राधिकरणले सार्वजनिक गरेको पछिल्लो एमआईएस रिपोर्ट अनुसार कात्तिक २०८१ मा एनसेलको मोबाइल सेवा प्रयोग गर्ने ग्राहकको सङ्ख्या एक करोड ४९ लाख ९१ हजार १६ रहेको थियो । तर त्यसयता फागुन मसान्तसम्म आइपुग्दा कम्पनीले ५ लाख ५७ हजार ७५८ ग्राहक गुमाएको देखिन्छ ।

नेपाल टेलिकम र एनसेलको पछिल्लो ६ महिनाको ग्राहक आधार

स्रोतः नेपाल दूरसञ्चार प्राधिकरण

हाल उसको मोबाइल सेवा प्रयोग गर्ने ग्राहकको सङ्ख्या एक करोड ४४ लाख ३३ हजार २५८ रहेको छ । उता प्रतिस्पर्धी नेपाल टेलिकमले भने यस अवधिमा सुधार गरेको छ ।

कात्तिकमा एक करोड ४६ लाख २९ हजार ८०४ ग्राहक रहेको कम्पनीले त्यसपछिका हरेक महिनामा ग्राहक वृद्धि गरेको तथ्याङ्कमा देखिन्छ । कात्तिक यताको चार महिनामा टेलिकमले ३ लाख ९९९ ग्राहक थप गर्दै कूल ग्राहक आधार एक करोड ४९ लाख ३० हजार ८०३ पुर्‍याउन सफल भएको छ ।

यससँगै नेपालको टेलिकम बजारमा नेपाल टेलिकमको बजार हिस्सा ५१.५२४% र एनसेलको ४८.४७२% हुन पुगेको छ ।