काठमाडौं । काठमाडौं प्रहरीले ठुलो मात्रामा चोरी भएका मोबाइल, ल्यापटप र ट्याब्लेट बरामद गर्दै सात जनालाई पक्राउ गरेको छ । शुक्रबार फेसबुक लाइभ गर्दै जिल्ला प्रहरी परिसरले यसबारे जानकारी दिएको दिएको हो ।
पक्राउ पर्नेहरूमा काभ्रेका प्रमोद परियार, गुनराज न्यौपाने, रौतहटका हेमन्त राना मगर, दोलखाका शम्भु विश्वकर्मा र सबिन पाण्डे, सिन्धुपाल्चोकका राजेश चालिसे र काठमाडौंका प्रकाश कटवाल रहेका छन् ।
उपत्यकामा पछिल्लो समय मोबाइल चोरीका घटना बढ्दै गएको गुनासोपछि विशेष अपरेसन सञ्चालन गर्दा एउटै रिपेयरिङ सेन्टरबाट ३०० बढी चोरीका डिभाइस फेला परेको जिल्ला प्रहरी परिसर, काठमाडौंका प्रमुख विश्व अधिकारीले जानकारी दिए ।
उनका अनुसार प्रहरीले जगातीस्थित सरोज मोबाइल रिपेयरिङ सेन्टरमा छापा मारेर २७१ थान मोबाइल, ९ थान ट्याब्लेट र १५ थान ल्यापटप बरामद गरेको हो ।
कोटेश्वरबाट ठिमी जाँदै गरेको सार्वजनिक बसमा यात्रा गरिरहेका व्यक्तिको मोबाइल चोरी भएको सूचना प्राप्त भएपछि अपरेसन सुरु गरिएको उनले बताए । तत्काल प्रहरी परिचालन गरी अनुसन्धान थाल्दा सात जना संलग्न व्यक्तिहरूलाई पहिचान गरिएको उनले उल्लेख गरे ।
पक्राउ परेकाहरूले चोरी भएका मोबाइलहरू सरोज मोबाइल रिपेयरिङ सेन्टरमा बिक्री गर्ने गरेको खुलासा गरेपछि प्रहरीले उक्त पसलमा छापा मारेको थियो ।
बरामद भएका मोबाइलहरूमध्ये सामसङ ८३ थान, आईफोन १८ थान, साओमी १९ थान, एमआई १५ थान, वनप्लस ४ थान, ओप्पो १८ थान, भिभो १४ थान, आइटेल ६ थान, रियलमी ८ थान, इन्फिनिक्स ३ थान, माइक्रोम्याक्स २ थान, लाभा १० थान, नोकिया ५ थान, पोको २ थान, अनर ३ थान, जियोनी ७ थान, कलर्स ४ थान, मोटोरोला ५ थान, टेक्नो २ थान, भिटु १ थान, कुलप्याड १ थान, ए प्लस १ थान, टिसिएल १ थान र ४ थान नाम नखुलेका ब्रान्डका रहेको छ ।
पक्राउ परेकाहरूमाथि थप अनुसन्धान भइरहेको प्रहरीले जनाएको छ ।
चोरी भएका मोबाइलहरू खोजेर सम्बन्धित व्यक्तिलाई फिर्ता दिने अभियानलाई निरन्तरता दिइने परिसर प्रमुख अधिकारले बताए । उनका अनुसार पछिल्लो डेढ महिनामा मात्रै ४८ वटा मोबाइल फेला पारी सम्बन्धित धनीलाई फिर्ता गरिएको छ । आर्थिक वर्ष २०७९/८० मा १६५० ओटा, २०८०/८१ मा ३२८ थान र २०८१/८२ मा २२८ ओटा मोबाइल धनीलाई बुझाइएको उनले जानकारी दिए ।
मोबाइल हराएको वा चोरी भएको खण्डमा त्यसलाई लोकेट गर्न फाइन्ड माई फोन लगायतका प्रविधि प्रयोग गर्न उनले सुझाव दिए । साथै, उनले सिम कार्डको आधारमा दूरसञ्चार सेवा प्रदायकको सहयोगमा हराएको मोबाइल पत्ता लगाउन सकिने बताए । मोबाइल चोरी न्यूनीकरणका लागि सचेत रहन आग्रह गर्दै उनले आवश्यक परेमा तत्काल प्रहरी सम्पर्क गर्न अनुरोध गरे ।
