वीरगञ्ज । अमेरिकाको क्यालिफोर्नियास्थित लस एन्जलस नजिकको समृद्ध क्षेत्र प्यासिफिक प्यालिसेड्समा फैलिएको डरलाग्दो आगोले हालसम्म एक हजार एकड क्षेत्र भन्दा बढी नष्ट गरिसकेको छ । शक्तिशाली सुख्खा हावा र अत्यन्तै सुख्खा वनस्पतिले मङ्गलवार आगलागीलाई झन् उग्र बनाएको छ ।

लस एन्जलस फायर डिपार्टमेन्ट (एलएएफडी) ले एक विज्ञप्ति जारी गर्दै आगलागीको क्षेत्रफल हालसम्म १,२६२ एकड पुगेको जनाएको छ । “हावाका कारण अझ फैलिन सक्ने सम्भावना छ । हावा रातिको समयमा उच्च हुने अनुमान गरिएको छ । अनिवार्य स्थानान्तरण क्षेत्र हाल परिवर्तन गरिएको छैन र यसले अधिकांश प्यासिफिक प्यालिसेड्स क्षेत्र समेट्छ,” विज्ञप्तिमा भनिएको छ ।

राष्ट्रपति जो बाइडेनले घटनाबारे नियमित रूपमा जानकारी लिइरहेको बताएका छन् । उनले आगलागी नियन्त्रणमा सङ्घीय सहयोग उपलब्ध गराउने घोषणा गरेका छन् ।

“मेरो टोलीले राज्य र स्थानीय अधिकारीहरूसँग निरन्तर सम्पर्क गरिरहेको छ, र मैले यस भयानक प्यासिफिक प्यालिसेड्स आगो नियन्त्रण गर्न आवश्यक कुनै पनि सङ्घीय सहयोग प्रदान गर्ने प्रस्ताव गरेको छु,” बाइडेनले एक विज्ञप्तिमा जारी गर्दै भनेका छन् ।

राष्ट्रपतिले फेडेरल इमर्जेन्सी म्यानेजमेन्ट एजेन्सी मार्फत फायर म्यानेजमेन्ट एसिस्टेन्स ग्रान्ट स्वीकृत भएको र क्यालिफोर्नियाको तात्कालिक आगलागी नियन्त्रण खर्च पूर्ति गर्न सहयोग गर्ने बताए । साथै, उनले प्यासिफिक प्यालिसेड्स र वरपरका क्षेत्रका बासिन्दालाई सतर्क रहन र स्थानीय अधिकारीहरूको निर्देशन पालन गर्न आह्वान गरेका छन् ।

क्यालिफोर्नियाका गभर्नर ग्याभिन न्यूसमले प्रभावित समुदायलाई सहयोग गर्न आपत्कालीन घोषणा गरेका छन् ।

“दक्षिणी क्यालिफोर्नियाका बासिन्दाहरू: सतर्क रहनुहोस्, आवश्यक सबै सावधानी अपनाउनुहोस्, र स्थानीय आपत्कालीन निर्देशन पालना गर्नुहोस्,” उनले आफ्नो सामाजिक सञ्जाल एक्समा लेखेका छन् ।

इन्टरनेटमा फैलिएका भिडियोहरूले आपत्कालीन सवारी साधनलाई बाटो खुलाउन बुलडोजरले कारहरूको लाइन सारिरहेको देखाएका छन् । आगलागीको जोखिम क्षेत्रलाई समेट्दै प्यासिफिक कोस्ट हाईवे नजिकका क्षेत्रहरूमा स्थानान्तरण आदेश दिइएको छ ।

एलएएफडीका प्रवक्ता एरिक स्कटले सामाजिक सञ्जालमा पोस्ट गरिएको भिडियोमा भने, “प्यासिफिक प्यालिसेड्स हाईल्यान्ड्स समुदाय नजिक आगो तीव्र रूपमा पश्चिमतर्फ फैलिँदै छ ।”

आगलागीको कारण पत्ता लाग्न नसकेको भए पनि क्यालिफोर्निया डिपार्टमेन्ट अफ फोरेस्ट्री एन्ड फायर प्रोटेक्सनको तथ्याङ्कका अनुसार, आगलागी स्थानीय समय अनुसार बिहान ११ बजेको करिबमा सुरु भएको थियो र हालसम्म यसलाई नियन्त्रणमा लिन सकिएको छैन ।

एलएएफडीले प्यासिफिक प्यालिसेड्स क्षेत्रका बासिन्दालाई तुरुन्तै स्थानान्तरण गर्न र वेस्टवुड रिक्रिएसन सेन्टरमा बसोबास गर्न आग्रह गरेको छ ।

“प्यासिफिक प्यालिसेड्स क्षेत्रमा बसोबास गर्ने व्यक्तिहरूले तुरुन्तै आफ्नो सवारी साधनमा मानिस र जनावर राखी क्षेत्र छोड्नुपर्छ । यदि तपाईँ अनिवार्य स्थानान्तरण क्षेत्रभित्र हुनुहुन्न भने, पहिलो प्रत्युत्तरकर्ताहरू र स्थानान्तरण गरिएका व्यक्तिहरूलाई छिटो हिँड्न मद्दत गर्न सडक खाली राख्नुहोस्,” एलएएफडीले जारी गरेको चेतावनीमा उल्लेख गरिएको छ ।

अमेरिकाको राष्ट्रिय मौसम सेवाले यसलाई “जीवन खतरामा पार्ने र विनाशकारी हावाहुरी” भनेको छ, जुन बुधवार बिहानसम्म चल्ने अनुमान गरिएको छ ।