वीरगंज | बाराको महागढीमाई नगरपालिकास्थित प्रसिद्ध गढीमाई मन्दिरमा विशेष पूजाका लागि प्रति व्यक्ति पाँच सय रुपैयाँ शुल्क ताेकिएकाे छ। हरेक पाँच वर्षमा हुने गढीमाई मेलाको औपचारिक शुभारम्भ घटस्थापनाका दिन, असाेज १७ गते भएको थियो। पशुबली भने मंसिरमा गरिने जनाइएको छ।

महागढीमाई नगरपालिकाका मेयर उपेन्द्र प्रसाद यादवले साेमबार पत्रकार सम्मेलनमा विशेष पूजा गर्ने भक्तजनका लागि पाँच सय रुपैयाँ शुल्क निर्धारण गरिएको जानकारी दिए। मन्दिरकाे व्यवस्थापन समितिको बैठकबाट यो निर्णय गरिएको बताउँदै, यादवले मन्दिरकाे मूर्ति छुन चाहने र विशेष पूजा गर्न चाहने भक्तजनलाई मात्र शुल्क लाग्ने प्रष्ट्याए। सर्वसाधारण भक्तजनका लागि भने कुनै शुल्क नलाग्ने जानकारी गराए।

विशेष पूजाका लागि शुल्क तोकिएको विषयमा केही व्यक्तिले सामाजिक सञ्जालमा नकारात्मक टिप्पणी गरेकोमा यादवले आपत्ति जनाए। उनले सामाजिक सञ्जालमा भ्रम फैलाउनेहरूमाथि कानुनी कारबाहीकाे चेतावनीसमेत दिए। देश–विदेशका अन्य मन्दिरहरूमा पनि विशेष पूजाका लागि शुल्क तोकिएको उदाहरण दिँदै, उनले स्वेच्छाले माताप्रति आस्था राख्ने भक्तजनले यो शुल्क तिर्ने बताए।

यादवले गढीमाई मन्दिरमा दर्शन र पूजापाठलाई व्यवस्थित बनाउन विशेष पूजाका लागि शुल्क तोकिएको बताए। उनका अनुसार, गढीमाई माताप्रति आस्था राख्ने हजारौं भक्तजनले हरेक पाँच वर्षमा यो मेलामा सहभागिता जनाउँछन्, र व्यवस्थापनका लागि आवश्यक स्रोतसाधन जुटाउन यस किसिमको निर्णय गरिएको हो।

सामान्य दर्शनका लागि भने शुल्क नलाग्ने हुँदा सबै भक्तजनले निःशुल्क रुपमा दर्शन गर्न सक्नेछन्। उनले यो निर्णयले मन्दिरको सञ्चालन र व्यवस्थापनमा सहयोग पुर्याउनेमा विश्वास व्यक्त गरे।

यसपटकको गढीमाई मेलामा स्थानीय तथा विदेशी भक्तजनहरूको उल्लेखनीय उपस्थिति रहने अपेक्षा छ। मन्दिर व्यवस्थापन समितिले मेलाको समयमा भक्तजनको सुविधाका लागि विभिन्न उपायहरू अपनाएको र विशेष पूजा गर्ने चाहना राख्ने व्यक्तिहरूका लागि सजिलो व्यवस्था मिलाइएको जानकारी गराएको छ।

यादवले थपे, “यो शुल्कले नकारात्मक प्रभाव पार्ने नभई, मन्दिरको व्यवस्थापन र पूजापाठको व्यवस्थापनलाई सशक्त बनाउने उद्देश्यले तय गरिएको हो। सबै भक्तजनले सहजै माताप्रति आस्था प्रकट गर्न पाउने वातावरण मिलाउने हाम्रो प्रयास हो।”