वीरगन्ज–१६ नयाँ बसपार्क परिसरमा साहिब दरबार पर्साको आयोजनामा २५० वटा बिरुवा रोपण गरिएको छ। साहिब दरबारको पाँचौं वार्षिकोत्सवको अवसरमा सोमबार आयोजित वृक्षारोपण कार्यक्रममा विभिन्न प्रजातिका बिरुवा लगाइएका हुन्।

वृक्षारोपण कार्यक्रममा ग्रिन सिटी सामुदायिक सेवा केन्द्र आदर्शनगरले पनि समन्वय गरेको थियो। प्रमुख अतिथि साहिब दरबारका पुज्य सरकार महाराज र विशिष्ट अतिथि वीरगन्ज महानगरपालिकाका मेयर राजेशमान सिंहको उपस्थितिमा कार्यक्रम सम्पन्न भएको हो।

कार्यक्रमको अध्यक्षता साहिब दरबार पर्साका अध्यक्ष उमेशलाल सहनीले गरेका थिए। कार्यक्रममा भारतीय महावाणिज्य दूतावास वीरगन्जका महावाणिज्यदूत देवीसहाय मीना, सशस्त्र प्रहरी उपरीक्षक राधेश्याम धिमाल, वीरगन्ज–५ का वडाध्यक्ष प्रदीप चौधरी, ग्रिन सिटीका अध्यक्ष जयप्रकाश खेतान र वीरगन्ज युवा समाजका संस्थापक अध्यक्ष कमल चौलागाईं लगायतको सहभागिता थियो।

वृक्षारोपणको यस कार्यक्रमले हरियाली प्रवर्द्धन र वातावरण संरक्षणमा योगदान पुर्याउने विश्वास लिइएको छ।

कार्यक्रममा बोल्दै प्रमुख अतिथि पुज्य सरकार महाराजले वातावरण संरक्षण आजको आवश्यकता भएको भन्दै यस्ता अभियानहरूलाई निरन्तरता दिनुपर्नेमा जोड दिनुभयो। मेयर राजेशमान सिंहले महानगरले पनि हरियालीलाई प्राथमिकतामा राखेको र भविष्यमा वृक्षारोपण तथा पर्यावरणीय कार्यक्रमहरूमा सहकार्य गर्न सधैं तयार रहेको बताउनुभयो।

भारतीय महावाणिज्यदूत देवीसहाय मीनाले दुई देशबीचको सम्बन्धलाई वातावरणीय गतिविधिहरूले थप बलियो बनाउने उल्लेख गर्दै यस्ता पहलहरूले सीमावर्ती क्षेत्रको वातावरणलाई सुधार गर्न मद्दत पुग्ने धारणा व्यक्त गर्नुभयो।

वृक्षारोपणपछि सहभागीहरूले बसपार्क क्षेत्रको सरसफाइमा पनि योगदान पुर्याएका थिए। यो अभियानले स्थानीय समुदायलाई वृक्षारोपण र सरसफाइमा संलग्न गराई वातावरणीय सचेतना फैलाउने उद्देश्य राखेको आयोजकले जनाएको छ।

यस किसिमका कार्यक्रमहरूले हरियाली कायम राख्न र नगरको सौन्दर्य बढाउन महत्त्वपूर्ण भूमिका खेल्ने विश्वास व्यक्त गरिएको छ।