वीरगन्ज | वर्षौदेखि जीर्णोद्धारको पर्खाइमा रहेको देशकै दोश्रो ठूलो वीरगन्जको नारायणी रंगशालाको जीर्णोद्धार र पुर्ननिर्माणका लागि वीरगन्जबासीले संघीय सरकारका युवा तथा खेलकुद मन्त्री विराजभक्त श्रेष्ठलाई गुहारेका छन् ।

आइतबार बिहान नारायणी रंगशालाको स्थलगत निरीक्षणमा पुगेका मन्त्री श्रेष्ठलाई रंगशालामै भेटेर वीरगन्जका खेलप्रेमी र अगुवाहरुले ज्ञापनपत्र बुझाँउदै नारायणी रंगशालाको जीर्णोद्धार र पुर्ननिर्माणका लागि आग्रह गरेका हुन् ।वीरगन्ज महानगरपालिकाका मेयर राजेशमानसिंहको उपस्थितीमा पर्सा क्रिकेट संघका अध्यक्ष मनिष सिंह लगायतले वीरगन्जबासीका तर्फबाट मन्त्री श्रेष्ठलाई ज्ञापनपत्रपनि बुझााए ।

विक्रम संवत २०४२ सालमा वीरगन्जबासीकै अग्रसरतामा १८ बिग क्षेत्रफलमा निर्माण गरिएको नारायणी रंगशाला मर्मत सम्भारको अभावमा बर्षौदेखि जीर्ण बन्दै गइरहेको छ ।झण्डै ३५ हजार दर्शक अटाउन सक्ने क्षमताको रंगशालाका प्याराफिटहरु ठाँउ ठाँउमा भत्एिका छन् भने पर्खालहरुपनि जीर्ण अवस्थामा छन् ।

चार बर्षपहिले राष्ट्रिय खेलकुद परिषदले रंगशालाको जीर्णोद्धार र पुर्ननिर्माणका लागि डिपिआर बनाएको थियो । त्यसमा २ अर्ब ६४ करोड रुपैयाँ लागत लाग्ने उल्लेख थियो । त्यसपछि सरकारले रंगशालाको पुर्ननिर्माणका लागि ७ करोड रुपैयाँमात्र विनियोजन गरेको थियो ।उक्त रकमबाट पुर्ननिर्माणको काम सुरु गरिएपनि रकम अभावले दुई बर्षदेखि त्यो काम रोकिएर अलपत्र अवस्थामा छ ।

आइतबार वीरगन्जबासीले मन्त्री श्रेष्ठलाई बुझाएको ज्ञापनपत्रमा अलपत्र रहेको रंगशाला पुर्ननिर्माणको काम पुन सुरु गर्नका लागि आवश्यक रकम सरकारको आगामी आर्थिक बर्षको बजेटमा विनियोजन गरिदिन आग्रह गरिएको छ ।

मन्त्री श्रेष्ठलाई ज्ञापनपत्र बुझाउँदै क्रिकेट संघ पर्साका अध्यक्ष सिंहले भने,‘ यो रंगशाला वीरगन्जको मात्रै नभई समग्र मधेस प्रदेशको धरोहर हो । त्यसका कारण सरकारको थोरै मात्र नजर यसमा पर्यो भनेपनि यसले फेरि नयाँ जीवन पाउन सक्छ ।त्यसका लागि सम्पूर्ण वीरगन्जबासीको तर्फबाट आग्रह छ ।’

ज्ञापनपत्र बुझ्दै मन्त्री श्रेष्ठले यसका लागि आँफुले स्थानीय सरकारसंग छलफल गरेर आगामी बजेटमा नारायणी रंगशालाको पुर्ननिर्माणका लागि आवश्यक रकम विनियोजन गर्ने प्रतिबद्धता जनाए ।

रंगशालाको स्थलगत निरीक्षणमा मन्त्री श्रेष्ठसंगै राष्ट्रिय स्वतन्त्र पार्टी(रास्वपा)का केन्द्रिय सदस्य तथा सांसद मनिष झा, रास्वपाका नेताहरु मुर्ली जलान, महादेव कुर्मी , शेखर अग्रवाल, दिपराज पटेल,मुकेश पटेल लगायतकोपनि सहभागीता थियो ।

रंगशालाको निरीक्षणपछि आइतबार नै वीरगन्ज महानगरपालिकाको कार्यालयमा स्वागत ग्रहण गर्न पुगेका मन्त्री श्रेष्ठलाई मेयर राजेशमान सिंहलेपनि नारायणी रंगशालाको जीर्णोद्धार र पुर्ननिर्माणका लागि आवश्यक बजेटको व्यवस्थापन गरिदिन आग्रह गरे ।आफनो कार्यकक्षमा मन्त्री श्रेष्ठलाई स्वागत गर्दै मेयर सिंहले बजेटको अभावमा रंगशलााको पुर्ननिर्माणको काम दुई बर्षदेखि अलपत्र परेको जानकारी गराए ।

राखेपले तयार पारेको डिपआिरमा २ अर्ब ६४ करोड रुपैयाँ लाग्ने भनिएपनि दुई बर्ष अघि सरकारले ७ करोड मात्र रकम दिएको र उक्त रकम सकिएपछि काम रोकिएको मेयर सिंहले मन्त्री श्रेष्ठलाई अवगत गराए ।मेयर सिंहले रंगशलाको पुर्ननिर्माणसंगै त्यहाँ छुट्टै क्रिकेट रंगशाला निर्माणकालागिपनि बजेटको व्यवस्थापन गरिदिन मन्त्री श्रेष्ठसंग आग्रह गरे ।
जवाफमा मन्त्री श्रेष्ठले नारायणी रंगशलाको पुर्ननिर्माणलाई विशेष प्राथमिकतामा राखेर बजेट व्यवस्थापनका लागि आँफुले पहल गर्ने आश्वासन दिए ।

काठमाडौंको दशरथ रंगशालापछिको ठूलो वीरगन्जको नारायणी रंगशाला जीर्णोद्धारको पर्खाइमा बसेको बर्षौ बितिसक्यो ।चारदशक पहिले निर्माण भएको नारायणी रंगशाला बर्षौदेखि जीर्ण अवस्थामा पुग्दापनि मर्मत सम्भारका लागि संघ र प्रदेश सरकारले चासो नदिएको वीरगन्ज्बासीको गुनासो छ ।

तत्कालीन अञ्चलाधीश लक्ष्यबहादुर गुरुङको पहलमा २०३८ सालमा १७ बिघा १० कट्ठा जग्गा फुटबल, क्रिकेट र कवर्ड हल निर्माणका लागि खरिद र अधिग्रहण गरिएको थियो ।२०४२ सालमा निर्माण भएको नारायणी रंगशालामा तत्कालीन राजा वीरेन्द्रले उद्घाटन मात्र गरेनन् तेस्रो राष्ट्रिय खेलकुद प्रतियोगितासमेत गराएका थिए ।