धनगढी | कैलालीको धनगढी उपमहानगरपालिका–१३ का एक जना पुरुषले घरकी श्रीमतीलाई परित्याग गरेर दोस्रो विवाह गरेका छन्।

चार वर्षअघि घरकी श्रीमतीलाई छलेर उनले दोस्रो विवाह गरेका हुन्। ती पुरुषले अर्काकी श्रीमती लगेर भारत फरार भएको पीडित महिलाको गुनासो छ। उनका अनुसार श्रीमानले अर्काकी श्रीमती लगेर फरार भएका छन्। यहाँ मलाई खान, लाउन र बस्न मुश्किल भइसकेको छ। खोजीकार्यका लागि प्रहरीमा निवेदन दिएपनि अहिलेसम्म श्रीमानको कुनै अत्तोपत्तो छैन्।

सुदूरपश्चिममा यसैगरी १३ जनाले सुटुक्क दोस्रो विवाह गरेका छन्। घरकी श्रीमतीलाई छलेर सुटुक्क दोस्रो विवाह गरेपछि श्रीमान विरुद्ध प्रहरीमा निवेदन परेको छ। घरकी श्रीमतीलाई परित्याग गरेर अर्को विवाह गरेको भन्दै कारबाहीका लागि १३ वटा निवेदन प्रहरीमा दर्ता भएका छन्।

सुदूरपश्चिम प्रदेश प्रहरी कार्यालय धनगढीले उपलब्ध गराएको विवरणअनुसार चालु आर्थिक वर्षको ७ महिनामा १३ जनाले दोस्रो विवाह गरेको भन्दै प्रहरीमा कारबाहीका लागि पीडित पक्षबाट निवेदन दर्ता भएको हो। पीडित महिलाहरुले घरमा श्रीमती र बालबच्चा भएकै अवस्थामा अर्को विवाह गरेर श्रीमानले बेवास्ता गरेको भन्दै कारबाहीका लागि प्रहरीमा निवेदन दिएका छन्।

श्रीमानले दोस्रो विवाह गर्दा आफुहरु बिचल्लीमा परेको समेत पीडित महिलाहरुको गुनासो छ। सुदूरपश्चिममा पछिल्लो समय वहुविवाह गर्ने बढेका छन्। घरमा श्रीमती हुँदाहुँदै अर्को विवाह गर्ने पुरुषको संख्या प्रदेशभित्र बढ्दै गएको हो। बढ्दो आधुनिकता तथा सहरीकरणसँगै वैवाहिक समस्या समाजमा बढ्दै गएको छ।

साथै विवाहको प्रकृति, बहुविवाह, पुनःविवाह, पारपाचुकेजस्ता घटनाहरुको वृद्धिले सामाजिक संरचनालाई समेत चुनौती दिइरहेको छ। मुलुकी अपराध संहिता, २०७४ को दफा १७५ अनुसार बहुविवाह गर्ने वा गराउने व्यक्तिलाई एक वर्षदेखि पाँच वर्षसम्म कैद र १० हजारदेखि ५० हजार रुपैयाँसम्म जरिवाना हुने व्यवस्था छ।

साथै बहुविवाह स्वतः बदर हुने समेत उक्त दफामा उल्लेख छ। जिल्ला अदालत कैलालीमा मात्र आर्थिक वर्ष २०७४/७५ मा १३, आर्थिक वर्ष २०७५/७६ मा २१ र आर्थिक वर्ष २०७६/७७ मा बुहविवाहका १७ मुद्दा दर्ता भएको अभिलेख छ। त्यस्तै आर्थिक वर्ष २०७७/७८ मा १७ वटा बहुविवाहका मुद्दा दर्ता भएका थिए।

बहुविवाहका आर्थिक वर्ष २०७९/८० सम्म आइपुग्दा ६७ मुद्दा दर्ता भएका छन्। जिल्लामा चालु आर्थिक वर्ष सुरु भएयता पनि वहुविवाह गर्नेको संख्या यसैगरी बढ्दै गएको छ। पीडितले जिल्ला प्रहरी हुँदै जिल्ला अदालतसम्म वहुविवाहको समस्यालाई लिएर उजुरी दर्ता गराउन थालेका छन्।