जनकपुर । जनकपुरमा खेलिरहेको बच्चालाई उठाएर लगेको आरोपमा एक महिला पक्राउ परेकी छन् । गत शनिबार अपरान्ह ५ बजेको समयमा जनकपुरधाम उपमहानगरपालिका वडा नं. २३ स्थित डेरा गरी बस्ने एक परिवारको एक बर्षे बच्चालाई उठाएर लैजाने क्रममा पक्राउ परेकी हुन् ।

जनकपुरधाम उपमहानगरपालिका वडा नम्बर २३ बस्ने स्थानीय दिपक झाको घरमा डेरामा बस्दै आएका २८ बर्षिय रुपेश कुमार झाको एक बर्षे छोरा रुद्धाआंश झालाई अपहरण गरी लगेको भन्दै महिलामाथि मुद्दा दायर गरिएको हो ।

डेराको पेसेजमा खेलिरहेको अवस्थामा जनकपुरधाम उपमहानगरपालिका वडा नम्बर २४ बस्ने बर्ष ४२ की बिभादेवी मण्डलले बच्चालाई काँखमा च्यापेर अपहरण गरी लगेको भन्दै उजुरीको आधारमा उनलाई पक्राउ गरी मुद्दा चलाएको हो । मण्डलले बच्चालाई लिएर महोत्तरीको लोहारपट्टि नगरपालिका वडा नम्बर ३ स्थित राखेको अवस्थामा बच्चासहित पक्राउ गरेको जिल्ला प्रहरी कार्यालय धनुषाले जनाएको छ । बिभा मण्डललाई नियन्त्रणमा लिँदै उनीमाथि मुद्दा दायर गरी अनुसन्धान प्रक्रिया अगाडी बढाएको हो ।