वीरगन्ज महानगरपालिका वडा नम्बर १५ ब्रम्हटोलको बस्ती नजिकैको स्थानमा नक्कली घिउ उत्पादन गरेको आशङ्कामा गत आइतवार प्रहरीले छापा मार्‍यो।त्यहाँ एउटा करीब १५ धुर जग्गामा इँटको पर्खाल उठाएर घेरिएको तथा माथिबाट जस्ताको छाना लगाएको टहरा देखिन्छ।

नजिकै घना बस्ती रहेको छ भने कारखाना नजिक एक विद्यालय र टाँसिएकै एक घर रहेको छ।

नजिकैका घरमूली अनवर अन्सारीले आफू उक्त स्थानमा तीन वर्षदेखि बस्दै आएको बताउँछन् र कारखाना भने करिब एकवर्षदेखि सञ्चालनमा आएको बताउँछन्।

‘खुद्रा पाइन्न’

उनले भने, “यहाँ आसपासमा मानिसहरू कारखानामा के भइरहेको छ वा के उत्पादन भइरहेको छ भनेर वास्ता गर्दैनथ्यौँ। छापा मारेपछि मात्र थाहा भयो। कारखानामा उत्पादन हुने घिउ हामीलाई पनि विक्री गर्नुहोस् न भन्दा खुद्रा नपाइने र बाहिरको लागि मात्र भएको कर्मचारीले बताउने गरेका थिए।”

अहिले उद्योगमा ताला लगाइएको देखिन्छ।

अर्की स्थानीय सविता देवीले भनिन्, “गाउँका मानिसहरूले किनेर खाएको भए? हालसम्म त कतिजनाको स्वास्थ्यमा कस्तो नराम्रो असर परेको हुन्थ्यो होला भन्ने कुरा सोचेरै चिन्ता लाग्छ। प्रहरीले छापा मारेपछि पो रहस्य बाहिर आयो।”

जिल्ला प्रहरी कार्यालय पर्साले वीरगन्ज महानगरपालिका वडा नम्बर १५ बाट नक्कली घिउ बनाउने कारखानामा गत आइतवार छापा मारी ३ जनालाई नियन्त्रणमा लिइएको जनाएको छ।

प्रहरी नायव उपरीक्षक वीरेन्द्रबहादुर शाहीका अनुसार, प्राप्त विशेष सूचनाको आधारमा जिल्ला प्रहरी कार्यालय पर्साको टोलीले लक्ष्मण ब्रह्मचोक नजिक सञ्चालन गरिएको अखाद्य पदार्थ, नक्कली घिउ बनाउने कारखानामा छापा मारेर कारखाना सञ्चालक सहित तीन जनालाई नियन्त्रणमा लिएर अनुसन्धान भइरहेको छ।

उद्योगका सञ्चालक वीरगन्ज १५ का अनिल श्रेष्ठ, सोही ठाउँका रमेश श्रेष्ठ र भारत जिल्ला मोतिहारी पूर्वी चम्पारणका कामदार रामविलास यादवलाई नियन्त्रणमा लिएर अनुसन्धान थालिएको पर्साका प्रमुख जिल्ला अधिकारी जितेन्द्र बस्नेतले बताए।

छापामार्ने क्रममा अनिल श्रेष्ठले सञ्चालन गरेको सिद्धि बिनायक पूजा सामग्री प्रोडक्टस उद्योगमा रसायन मिसावट गरी तयार पारिएको नक्कली घिउ विभिन्न ब्राण्डमा फेला पारिएको जिल्ला प्रशासन कार्यालयले जनाएको छ।

कारखानामा पूजा, दुर्गा र गोकुल नामक शुद्ध घिउको लेबल र विभिन्न ब्रान्डका स्टिकर लगाई नक्कली घिउ उत्पादन तथा विक्री वितरण भएको प्रहरीको भनाइ छ।

प्रहरी नायव उपरीक्षक शाहीले भने,” आइतवार साँझ कारखानामा १२ किलोको दरले पूजा, दुर्गा र गोकुल ब्राण्डका ५२ कार्टुन घिउ, डाल्डा घिउ २० किलोको दरले २९ कार्टुन र पाम आयलबाट अखाद्य तथा नक्कली घिउ बनाउन प्रयोग हुने २ किसिमको रसायन, लेबलिङ गर्न प्रयोग हुने विभिन्न ब्राण्डका स्टिकर , घिउ तौल गर्ने मेशिन, भाँडा कुँडा, चुलो, सिलिन्डर, कराइ, लगायतका सामग्री बरामद गरिएको छ।

अनुसन्धान

उक्त उद्योगबाट नक्कली घिउ उत्पादन भइरहेको सूचनाको आधारमा छापा मारिएकोमा तीनै जनालाई अदालतबाट म्याद थप गराइ अनुसन्धान भइरहेको बताइएको छ।

यो वर्ष नक्कली घिउ उद्योग फेला परेको यो पहिलो घटना भएको प्रहरी नायव उपरीक्षक शाहीले बताए।

प्रमुख जिल्ला अधिकारी जितेन्द्र बस्नेतले अनुसन्धान अधिकृतले नमूना लिएर त्यसमा मिसावटको मात्रा तथा त्यसले पुर्‍याउन सक्ने हानिबारे छानबिन हुँदैछ।

उनले अनुसन्धानका लागि समय लाग्ने बताए।