वीरगन्ज | वीरगन्जमा सडक विस्तारको क्रममा रहेको मेनरोड (मुख्य सडक) क्षेत्रलाई केबलरहित बनाउँदै विद्युत, खानेपानी र टेलिकमका संरचना (पाइप) भूमिगत गर्न महानगरपालिकाले पहल थालेको छ ।

वीरगन्ज महानगरपालिकाका प्रमुख राजेशमान सिंहको अध्यक्षतामा बिहीबार बसेको सरोकारवाला निकायसहितको बैठकले विस्तारका क्रममा रहेको मुख्य सडक निर्माणको विस्तृत परियोजना प्रतिवेदन (डीपीआर) लाई अन्तिम रूप दिँदा विद्युत, खानेपानी, टेलिकम तथा केबल नेटवर्क (तार)लाई भूमिगत रूपमा समेटेर एकीकृत डिजाइन, इस्टिमेट र कार्यान्वयनको व्यवस्था मिलाउन सडक डिभिजन कार्यालय हेटौँडालाई अनुरोध गर्ने निर्णय गरेको हो ।

यसअघि तयार गरिएको डीपीआरमा समेत खानेपानी, विद्युत् र केबल नेटवर्कलाई भूमिगत बनाउने व्यवस्था समेटिएको थियो । त्यही व्यवस्थालाई आधार बनाएर सडक निर्माणसँगै आवश्यक पूर्वाधारको एकीकृत व्यवस्थापन गरिने मेयर सिंहले बताऐ । यसबाट सडक निर्माणपछि पटक–पटक सडक खन्नुपर्ने अवस्था अन्त्य हुनुका साथै मुख्य सडक व्यवस्थित र सुरक्षित हुने उनले बताए ।

यसैबीच, मेनरोड विस्तारका क्रममा मुख्य सडक सीमाक्षेत्रभित्र रहेका खानेपानी, विद्युत, टेलिकमलगायतका निकायका संरचना व्यवस्थापन गर्न पनि बैठकले सडक डिभिजन कार्यालयसंग आग्रह गरेको छ । ती संरचना हटाउने क्रममा सडक तथा नाला क्षेत्रमा थुप्रिएको फोहोर र निर्माणजन्य सामग्रीका कारण कतिपय स्थानमा नाला अवरुद्ध भएकाले तत्काल सरसफाइ गर्नसमेत महानगरपालिकाले अनुरोध गरेको छ ।

महानगरपालिकाले सडक तथा नाला क्षेत्रमा थुप्रिएका फोहोर र निर्माण सामग्री तत्काल हटाई आवश्यक सरसफाइको व्यवस्था मिलाउन सडक डिभिजन कार्यालय हेटौँडालाई बिहीबार नै पत्राचार पनि गरेको छ । वर्षा याममा फोहोरका कारण पानीको निकास प्रभावित हुन सक्ने तथा लामखुट्टेको प्रकोप र संक्रमणजन्य रोगको जोखिम बढ्न सक्ने भएकाले सरसफाइलाई प्राथमिकता दिइएको महानगरपालिकाले जनाएको छ ।

दसैं र तिहार लगायतका चाडपर्वसमेत नजिकिँदै गएको अवस्थामा महानगर क्षेत्रको स्वच्छता, सरसफाइ र जनस्वास्थ्यलाई ध्यानमा राख्दै सडक विस्तारसँगै फोहोर व्यवस्थापनको कामलाई अघि बढाइएको मेयर सिंहले बताए । सरसफाइ तथा संरचना व्यवस्थापनका क्रममा आवश्यक समन्वय र सहकार्य गर्न महानगरपालिका तयार रहेको उनले बताए ।

बैठकमा वीरगन्ज महानगरपालिकाका प्रमुख प्रशासकीय अधिकृत बसन्तबहादुर बोहोरा, सडक डिभिजन कार्यालय हेटौँडाका इन्जिनियर दुर्गाप्रसाद, नेपाल विद्युत् प्राधिकरण वीरगंजका निर्मल कुमार फौजदार, नेपाल टेलिकम वीरगन्जका प्रमुख इन्जिनियर दिलिप कुमार बर्मा र खानेपानी संस्थान वीरगन्जका प्रमुख मोहनदत्त भट्टलगायतको उपस्थिति थियो ।