वीरगन्ज : वीरगन्जमा रहेका विभिन्न अस्पतालमा कमिशनको चक्करले स्वास्थ्य संस्थालाई बद्नाम बन्दै गइरहेको छ । यसरी बदनाम हुनुको कारण हो सरकारी मापदण्ड भन्दा बढी शूल्क लिनु र त्यो स्वास्थ्यकर्मीलाई दिनु ।

त्यहाँका अस्पतालमा गएका बिरामीहरुलाई डाक्टरहरुले नै विभिन्न स्वास्थ्य संस्थाको नाम दिने गर्छन । त्यहाँ जाँदा सरकारले तोकिएभन्दा कयौ गुणा रकम तिर्नुपर्ने बाध्यता छ । वीरगन्ज निजी अस्पताल समेतमा मधुमेहसहित अन्यको रगत परीक्षण शूल्क स्वास्थ्य मन्त्रालयअन्तर्गतको राष्ट्रिय जनस्वास्थ्य प्रयोगशालाले तोकेभन्दा चार गुणा बढी शूल्क लिने गरेका छन् ।

यता स्वास्थ्य मन्त्रालय अन्तर्गतको राष्ट्रिय जनस्वास्थ्य प्रयोगशालाले रु २५ मात्र शूल्क निर्धारण गरेको छ । तर सरकारी अस्पताल नारायणीको प्रयोगशालाले पनि रु एक सय लिने गरेको छ । सरकारी अस्पतालले नै मन्त्रालयको आदेश पालना नगरेपछि यहाँका निजी अस्पताल र प्रयोगशालाहरूले मधुमेहको परीक्षण शूल्क मनोमानीरूपले लिने गरेको पाइएको छ । राष्ट्रिय जनस्वास्थ्य प्रयोगशालामा ब्लड कल्चर रु १२५, पिसाब जाँच रु २५ मा मात्र हुन्छ । तर वीरगन्जमा सोही परीक्षणको तीन गुना बढी शूल्क लिइने गरिएको छ । प्रयोगशालामा एचआइभी परीक्षण रु १५० मा गरिन्छ भने वीरगन्जमा रु ५०० सय तिर्नुपर्छ ।

राष्ट्रिय प्रयोगशालामा रु ५०० मा थाइराइड परीक्षण हुन्छ तर वीरगन्जमा रु पन्ध्र सयसम्म लिने गरेको पाइएको छ । स्वास्थ्य क्षेत्रमै ब्रम्हलुट मच्चाउने त्यहाँका अस्पतालमा कार्यरत चिकित्सकहरु मुख्य जिम्मेवार रहेका छन् । चिकित्सकहरूले प्रयोगशालामा बिरामीलाई विभिन्न रोगको परीक्षण गर्न लेखी पठाए बापत सबै प्रयोगशालाको चिकित्सकलाई दिने कमिशनको रेट भिन्दाभिन्दै छ । कम्तीमा तीस र बढीमा सत्तरी प्रतिशत कमिशन चिकित्सकले लिने गरेको प्रयोगशाला सञ्चालकहरूले बताउने गरेका छन् । चिकित्सकलाई कमिशन दिनुपर्दा सोको मार बिरामीले भोग्नुपरेको उनीहरूको कथन रहेको छ ।

यसरी राष्ट्रिय जनस्वास्थ्य प्रयोगशालाले २८० भन्दा बढी विभिन्न परीक्षणको शूल्क निर्धारण गरेको छ तर वीरगन्जका कुनै पनि प्रयोगशालाले शूल्क निर्धारण गरेको पाइएको छैन । वीरगन्जमा यसो नहुनुको मुख्य कारण परीक्षण शूल्कमा चिकित्सकहरूको कमिशन समावेश हुनु हो ।

क्लिनिक सञ्चालन गरेर बसेका चिकित्सकहरुले सबैभन्दा बढी कमिशन लिने गरेका छन् । राष्ट्रिय जनस्वास्थ्य प्रयोगशालाले कार्यक्षमता अनुसार प्रयोगशालाहरूलाई पाँच श्रेणीमा वर्गीकरण गरेको छ । राष्ट्रिय जनस्वास्थ्य प्रयोगशालामा दर्ता रहेको ‘ए’ श्रेणीको प्रयोगशाला वीरगन्जको मङ्गलम डाइग्नोस्टिक सेन्टर हो ।

यसबाहेक ‘बी’ श्रेणीमा भिजन डाइग्नोस्टिक, तराई हस्पिटल एन्ड रिसर्च सेन्टर, नारायणी सेन्ट्रल डाइग्नोस्टिक लेबोरेट्री, ‘सी’ श्रेणीमा एनएमसी पोलिक्लिनिक एन्ड डाइग्नोस्टिक सेन्टर, वीरगन्ज ओम हस्पिटल प्रालि र ‘डी’ श्रेणीको प्रयोगशालामा इलाइट प्याथोलोजी ल्याब, ओम प्याथोलोजी सेन्टर, अर्चिता डाइग्नोस्टिक सेन्टर, अर्पिता डाइग्नोस्टिक एन्ड रिसर्च सेन्टर र श्रीराम डाइग्नोस्टिक सेन्टर छन् । यी बाहेक वीरगन्जमा सबै ‘ई’ श्रेणीका प्रयोगशालाहरू हुन् ।सबै प्रयोगशालाले वर्गीकरण अनुसार सेवा र शूल्क निर्धारण गर्नुपर्छ ।