वीरगंज । वीरगञ्जस्थित नारायणी अस्पतालमा किशोरीहरूलाई लागिरहेको पाठेघरको मुखको क्यान्सर विरुद्ध ‘एचपीभी’ खोप अभियानको समयावधि थप गरिएको छ । खोप अभियानको अवधि असोज ५ गतेसम्मका लागि थपिएको अस्पतालका मेडिकल सुपरिटेन्डेन्ट डा. चितरञ्जन साहले जानकारी दिए । उनले भने, ‘अपेक्षाअनुसार खोप लगाउन किशोरीहरू नआएपछि अभियानको समय थप गरिएको हो ।

डा. साहका अनुसार गत भदौ २९ गते बाल दिवस, भदौ ३० गते शनिवार, असोज १ गते हरितालिका तीज, आज असोज २ गते मङ्गलवार ऋषि पञ्चमी र गणेश चतुर्थी र भोली असोज ३ गते संविधान दिवसलगायतका पर्व लगातार बिदा परेकाले किशोरी खोप लगाउन न्यून सङ्ख्यामा आएको बताए । नारायणी अस्पतालमा हालसम्म एक सय ८७ जना किशोरीहरूले मात्र खोप लगाएको उनले जानकारी दिए । ‘हामीले प्राप्त गरेको १५ सय खोपमध्येबाट अहिले केवल एक सय ८७ जना किशोरीहरूले मात्र खोप लिएका छन्,’ उनले भने, ‘त्यहीँ भएर समयावधि थप गरिएको छ ।’

डा. साहले पर्सी असोज ४ गतेदेखि बिहान १० बजेदेखि साँझ ५ बजेसम्म नारायणी अस्पतालस्थित पश्चिम तर्फको भवनमा रहेको नियमित खोप केन्द्रमा पुगेर १७ वर्ष उमेर पूरा भई १५ वर्ष नकटेका किशोरीहरूले नि:शुल्क रूपमा पाठेघरको मुखको क्यान्सर विरुद्ध ‘एचपीभी’ खोप लगाउन सक्ने बताए । उनले किशोरीहरूलाई पाठेघरको मुखमा हुने क्यान्सरबाट बचाउनका निमित्त उनीहरूका अभिभावकलाई खोप लगाउन नारायणी अस्पताल ल्याउन आग्रह पनि गरे । खोप पहिलो मात्रा दिइने र छ महिनापछि दोस्रो मात्रा दिइने छ । एचपिभी खोप दुई मात्रा लगाएपछि पाठेघरको मुखमा हुने क्यान्सरको सङ्क्रमण ९५ प्रतिशत सुरक्षा प्रदान गर्ने बताइएको छ । यसअघि सरकारले सन् २०१६–१७ मा पाठेघरको मुखको क्यान्सरविरुद्धको खोप नमुनाका रूपमा चितवन र कास्कीमा सञ्चालन गरेको थियो । असुरक्षित यौन सम्पर्क, धूम्रपान र सानै उमेरमा विवाह गर्नेजस्ता कारणले पाठेघरको मुखमा क्यान्सर हुने जनाइएको छ ।