वीरगंज । नवलपरासीका सीमा नाकाबाट दिनहुँ भारतबाट भन्सार छली गरेर ल्याएका सामान भित्रिने गरेका छन्। सबैभन्दा बढी जिल्लाको भुजहवा, महेशपुर, झोलनीपुर, लक्ष्मीपुर, बसैया सीमा नाकाबाट भन्सार छलेर ल्याएका सामान भित्रिने गरेका हुन्। तस्करीको ट्रान्जिट प्वान्टकै रूपमा चिनिने यी नाकाबाट पछिल्लो दुई महिनायता ठूलो मात्रामा तस्करीका सामान नभित्रिए पनि छिट्फुट्ट तस्करीको कार्य भने रोकिएको छैन। सीमा नाकामा नेपाल प्रहरी र सशस्त्र प्रहरीका कार्यालय र युनिट छन्। तस्करी कार्यलाई रोक्न भन्दै सवारीसाधन र पैदलयात्रीलाई गस्ती बढाएको नेपाल प्रहरी र सशस्त्र प्रहरीले जनाउँदै आएका छन्। तर तथ्यांकलाई हेर्दा तस्करीका सामान बरामद गर्नेमा प्रहरीका यी दुवै संगठन कमजोर देखिएका छन्। यी दुई संगठनको तुलनामा भन्सार कार्यालय झनै कमजोर देखिएको छ। भन्सार कार्यालय, नेपाल प्रहरी र सशस्त्र प्रहरीमध्ये तस्करीका सामान बरामद गर्नेमा बुटवलस्थित राजस्व अनुसन्धान कार्यालय अघि देखिएको छ। जिल्लामा राजस्व अनुसन्धान कार्यालय, नेपाल प्रहरी, सशस्त्र प्रहरी र महेशपुर भन्सार कार्यालय गरी चार निकायले अवैध सामान बरामद गर्दै आएका छन्। दुई प्रहरी संगठन र भन्सार कार्यालयले नाका र सम्भावित स्थानमा नियमित निगरानी र गस्ती गर्दै आएको जनाए पनि कसैले दिएको सूचनाको आधार र छड्के रूपमा कहिलेकाहीँ जिल्लामा गस्ती गर्न आउने राजस्व अनुसन्धान कार्यालयको टोलीले बरामद गरेको सामानको मूल्य हेर्दा उनीहरू कमजोर मात्र देखिएका छैनन्, मिलेमतोमा तस्करी हुँदै आएको आशंका पनि गरिएको छ।

अन्नपूर्ण पोस्ट्ले संकलन गरेको छुट्टाछुट्टै विवरणअनुसार आव २०७९/८० को एक वर्षको अवधिमा जिल्लाबाट कुल ३६ करोड ९४ लाख ७९ हजार रुपैयाँबराबरका अवैध सामान बरामद भएका छन्। जसमा सबैभन्दा बढी राजस्व अनुसन्धान कार्यालय बुटवलले बरामद गरेको छ। कार्यालयको गस्ती टोलीले मात्र २३ करोड ४ लाख ६१ हजार रुपैयाँबराबरको अवैध सामान नवलपरासीबाट बरामद गरेको अनुसन्धान कार्यालयका सूचना अधिकारी हुमबहादुर पाण्डेले जानकारी दिए। त्यस अवधिमा नेपाल प्रहरीले ६ करोड २० लाख रुपैयाँको सामान बरामद गरेको जिल्ला प्रहरी कार्यालयका सूचना अधिकारी डीएसपी भोजराज पाण्डेले जानकारी दिए। त्यस्तै गण र मातहतका युनिटले एक वर्षको अवधिमा ३ करोड १ लाख रुपैयाँको अवैध सामान बरामद गरेको सशस्त्र प्रहरी बल नेपाल २६ नं. गण हे.क्वा नवलपरासीका एसपी धीरेन्द्रराज न्यौपानेले जानकारी दिए। महेशपुर भन्सार कार्यालयले ४० लाख १८ हजार रुपैयाँबराबरको अवैध सामान बरामद गरेको कार्यालय प्रमुख बुद्धिकुमार चुडालले जानकारी दिए। त्यसैगरी नवलपरासीका नाका हुँदै गएको ४ करोड २९ लाख रुपैयाँबराबरको अवैध सामान रूपन्देही र पूर्वी नवलपरासी प्रहरीले ती जिल्लाबाट बरामद गरेको छ। एक वर्षको अवधिमा चारवटै निकायबाट जिल्लाबाट कुल १ सय २३ सवारीसाधन र कारोबारमा संलग्न ३४ जना पक्राउ परेका छन्। पक्राउ पर्ने सवारीसाधनमा सबैभन्दा बढी मोटरसाइकल छन्। जिप, कार, भ्यान र ट्रकसमेत नियन्त्रणमा परेका छन्।

भुजहवा, महेशपुर, झोलनीपुर, लक्ष्मीपुर, बसैया नाकाबाट भन्सार छलीका सामान भित्रिने
सामान बरामद गर्नेमा नेपाल प्रहरी र सशस्त्रभन्दा राजस्व अनुसन्धान कार्यालय अगाडि
नेपाल प्रहरीले १ सय २ सवारीसाधन र २७ जनालाई पक्राउ गरेको सूचना अधिकारी सीपी पाण्डेले जानकारी दिए। त्यस्तै सशस्त्र प्रहरीले पिकअप, मोटरसाइकल गरी १५ सवारीसाधन पक्राउ गरेको छ।

भन्सार कार्यालयले ६ सवारीसाधन पक्राउ गरेको छ। पक्राउ परेका सवारीसाधनमध्ये १ जफत भएको, ४ फिर्ता दिएको र १ हकदाबीको प्रक्रियामा रहेको भन्सार प्रमुख चुडालले बताए। सशस्त्र प्रहरी र भन्सार कार्यालयले अवैध सामान र सवारीसाधन पक्राउ गरे पनि कारोबारमा संलग्न व्यक्ति भने पक्राउ नपरेको जनाएको छ। प्रहरी गस्ती टोलीलाई देख्नेबित्तिकै सामान छाडेर भाग्ने सशस्त्र र भन्सार कार्यालयले जनाएका छन्। त्यस्तै, राजस्व अनुसन्धान कार्यालयले जिल्लाबाट ६ सवारीसाधन पक्राउ गरेको कार्यालयका सूचना अधिकारी पाण्डेले जानकारी दिए। बरामद सवारीसाधनमा ४ पिकअप, १÷१ ट्रक र कार छन्। बरामद सवारीसाधनमध्ये कारलाई अदालतले जफत गरेको र अन्य पाँच वटालाई जफतका लागि उच्च अदालत तुलसीपुर बुटवल इजलास माग दाबी गरिएको पाण्डेले बताए। त्यस अवधिमा कारोबारमा संलग्न १७ जना अनुसन्धानमा रहेका कार्यालयले जनाएको छ। त्यस्तै सशस्त्र र नेपाल प्रहरीले बरामद गरेका केही सामान र सवारीसाधनलाई महेशपुर भन्सार कार्यालय र राजस्व अनुसन्धान कार्यालय पठाउने गरेको जनाएका छन्। भन्सारमा पठाइएका सामान, सवारीसाधन र व्यक्तिलाई दण्ड जरिवाना वा लिलाम गर्नुपर्ने भए सोहीअनुसार भन्सार आफंैले गर्ने गरेको भन्सार कार्यालय प्रमुख चुडालले जानकारी दिए। यी चारवटै निकायले बरामद गरेका सामानमा चिनी, चामल, लत्ताकपडा, मोबाइल, मोटर पार्टस, हार्डवेयरलगायतका रहेका छन्।