वीरगंज | कृष्णा श्रीवास्तव | देशको प्रमुख व्यापारिक नाका वीरगंज भन्सार क्षेत्र फेरि एक पटक तस्करीको खबरले तातेको छ। सीमा सुरक्षा र भन्सार अनुशासनको जिम्मेवारी पाएका सशस्त्र प्रहरीकै संलग्नतामा तस्करीको जालो सञ्चालन भइरहेको खुलासा भएको छ। यसपटक प्रहरी नायब उपरीक्षक (DSP) लोकेन्द्र सुबामाथि प्रत्यक्ष संलग्नताको आरोप लाग्दैछ।
स्थानीय स्रोतका अनुसार, DSP सुबाको निर्देशनमा भारतबाट कपडा, इलेक्ट्रोनिक्स, मोटर पार्ट्स, माछा, सूर्तीजन्य पदार्थ र अन्य दैनिक उपभोग्य वस्तुहरू नेपाल भित्र्याइन्छ भने नेपालबाट मदिरा, सुपारी, चाइनिज स्याउ लगायतका सामग्री अवैधरूपमा भारत पठाइन्छ। विशेष सुराकी स्रोतले दिएको जानकारी अनुसार, वीरगंज भन्सार बीओपी (सीमा प्रहरी चौकी) भित्रै तस्करीको बाकायदा रेट लिस्ट तयार गरिएको छ। समातिएको मालको प्रकार र परिमाण अनुसार रकम तिरेपछि छोड्ने चलन छ। प्रहरी जवानहरू पनि उच्च अधिकारीको निर्देशन भन्दै चुप लाग्न बाध्य रहेको स्रोतको दाबी छ।
“कहिलेकाहीँ हामी रोक्न चाहन्छौं तर आदेश आउँछ — ‘यो माल नछेक्ने’, अनि के गर्न सकिन्छ र?” एक सुरक्षाकर्मीले नाम नखुलाउने शर्तमा भने। टेम्पो, ई-रिक्सा, मोटरसाइकल, साइकल, र पिकअप भ्यानहरू प्रयोग गरेर भन्सार छली सामान ओसार्ने काम नियमितजस्तै भइरहेको देखिन्छ। इनर्वा, इनरवा गाउँ जस्ता नाकाबाट सामान सहजै नेपाल भित्र्याइन्छ। भारतको रक्सौलबाट सूर्तीजन्य पदार्थ (गुटखा, पान मसाला, रजनीगन्धा), हार्डवेयर, कस्मेटिक, माछा, र कबाडसमेत ल्याएर वीरगंजको मिना बजार र बिर्ता बजारमा बिक्री वितरण भइरहेको छ।
घटनामा संलग्न भनिएका DSP सुबालाई सम्पर्क गर्दा मोबाइल स्विच अफ देखिएको छ। उता, पर्सा १३ नम्बर गणका एसपीले भने यस्तो अनियमितताप्रति असहमति जनाउँदै छानबिन र कारबाहीका लागि आफू तयार रहेको बताएका छन्। तर DSP सुबामाथि यति गम्भीर आरोप सार्वजनिक भइसकेपछि पनि कुनै छानबिन प्रक्रिया अगाडि नबढ्नुले प्रहरी संगठन भित्रै उच्च तहको संरक्षण रहेको आशंका बलियो बनाएको छ।
सीमा सुरक्षाको जिम्मेवारी पाएका निकायकै संलग्नतामा तस्करीजस्तो गम्भीर अपराध हुनुले राज्यसंयन्त्रको कमजोर नियमन र भित्री सिण्डिकेटको संकेत दिन्छ। अब प्रहरी संगठन, गृह मन्त्रालय र अख्तियारजस्ता निकायहरूले तत्काल निष्पक्ष र प्रभावकारी छानबिन अगाडि बढाउने कि यस्तै घटनाहरू गुम्सिएर जाने, त्यो समयले देखाउनेछ।
