वीरगञ्ज | सशस्त्र प्रहरी बल, नेपाल प्र.सी.सु. गुल्म वीरगञ्जद्वारा भारतबाट भन्सार छली गरी ल्याइएका अवैध सामग्री नियन्त्रणमा लिई १३ लाख ४४ हजार २० रुपैयाँ बराबरको सामान वीरगञ्ज भन्सार कार्यालयमा दाखिला गरिएको छ।

मिति २०८२ साल जेठ २९ गते, वीरगञ्ज महानगरपालिका–१६ स्थित नगुवा गाउँको डम्पिङ साइट नजिकबाट सशस्त्र प्रहरीको टोलीले ५ वटा साइकलमार्फत अवैध रूपमा ल्याइँदै गरेको करीब रु. ७,६७,९०० बराबरको कपडा तथा साइकलसहित नियन्त्रणमा लिएको हो। साथै उक्त कार्यमा प्रयोग गरिएको ना १६ प ६२७५ नम्बरको मोटरसाइकलसमेत बरामद गरिएको छ, जसको भन्सार मूल्याङ्कन रु. १,५०,००० रहेको छ।

त्यसै दिन सशस्त्र प्रहरीको अर्को टोलीले वीरगञ्ज–१६ का विभिन्न सीमावर्ती नाकाहरूबाट लुकाइछिपाई ल्याइएका रु. ४,२६,१२० मूल्य बराबरका इलेक्ट्रोनिक सामग्रीसहित अन्य सामानहरू समेत नियन्त्रणमा लिई आवश्यक कारबाहीको लागि वीरगञ्ज भन्सार कार्यालयमा बुझाएको सशस्त्र प्रहरी नायव उपरीक्षक तथा सूचना अधिकारी देवेन्द्र बहादुर सिंहले जानकारी दिनुभयो। सशस्त्र प्रहरीले अवैध कारोबार रोक्न निरन्तर निगरानी बढाउँदै आएको जनाएको छ।