वीरगञ्ज | भन्सार जाँचपास परीक्षण कार्यालय त्रिपुरेश्वरको आयोजनामा वीरगञ्ज भन्सार कार्यालयको सभाहलमा भन्सार जाँचपास परीक्षणसम्बन्धी अन्तरक्रिया कार्यक्रम सफलतापूर्वक सम्पन्न भएको छ।
कार्यक्रममा वीरगञ्ज उद्योग वाणिज्य संघका अध्यक्ष श्री हरिप्रसाद गौतमले वीरगञ्जमै भन्सार संपरिक्षण कार्यालय स्थापना गर्नुपर्ने आवश्यकता औंल्याउँदै, जाँचपासपछि सोको निरीक्षण कार्य यहीँबाट सम्पन्न गर्ने व्यवस्था भएमा उद्योगी व्यवसायीहरूले भोग्दै आएका धेरैजसो समस्या समाधान हुने विश्वास व्यक्त गर्नुभयो।
उक्त कार्यक्रममा भन्सार जाँचपास परीक्षण कार्यालयका प्रमुख चिरन्जीवि अधिकारी, प्रमुख भन्सार प्रशासक श्री दीपक लामिछाने, उद्योग वाणिज्य संघका वरिष्ठ उपाध्यक्ष श्री माधव राजपाल, प्रमुख प्रशासकीय अधिकृत श्री मनोज उपाध्यायसहित उद्योगी व्यवसायीहरूको उल्लेखनीय उपस्थिति रहेको थियो।
कार्यक्रमले भन्सार प्रक्रिया सुधार, जाँचपास प्रणालीलाई थप पारदर्शी र प्रभावकारी बनाउने विषयमा सरोकारवालाबीच महत्वपूर्ण छलफलको अवसर प्रदान गरेको थियो।
