वीरगन्ज | वीरगन्जका सुनचाँदी व्यवसायीहरुले पसलमा ताल्चा मारेर चाबी जिल्ला प्रशासन कार्यालयमा बुझाएका छन् ।
आगामी आर्थिक वर्ष २०८२/०८३ का लागि सरकारले ल्याएको बजेटमा सुनमा २ प्रतिशत विलासिता कर र हिरामा १३ प्रतिशत मूल्यअभिवृद्धि कर (भ्याट) लगाएको विरोधमा देशभरका सुनचाँदी व्यसायीहरु बिहीबारदेखि पसल बन्द गरेर आन्दोलनमा उत्रिएका छन् । त्यसैक्रममा वीरगन्जका सुनचाँदी व्यवसायीहरुलेपनि बिहीबार आ–आफ्ना पसल बन्द गरेर चाबी जिल्ला प्रशासन कार्यालयमा बुझाएका हुन् ।

पर्सा सुनचाँदी व्यवसायी संघका अध्यक्ष भूलन साह सोनारको नेतृत्वमा विरोध ¥याली निकालेर जिल्ला प्रशासन कार्यालयमा पुगेका सुनचाँदी व्यवसायीहरुले सहायक प्रमुख जिल्ला अधिकारी सुमन कार्कीलाई ७ बुँदे मागसहितको ज्ञापनपत्र र पसलको चाबी बुझाएका हुन् । विरोध ¥याली र चाबी बुझाउने कार्यक्रममा पर्सा सुनचाँदी कालीगढ संघकोपनि सहभागिता थियो ।
पर्सा सुनचाँदी व्यवसायी संघले सहायक प्रमुख जिल्ला अधिकारी कार्कीलाई बुझाएको ज्ञापनपत्रमा सुन तथा सुनका गहनामा लगाइएको २ प्रतिशत विलासिता कर खारेज हुनुपर्ने,हिरा–जवाहरत जडित गरगहनामा लगाइएको १३ प्रतिशत भ्याट खारेज हुनुपर्ने,सुनचाँदीको कारोबारलाई प्रोत्साहित गर्न ऐन,नियम तथा नीतिहरु बनाउनुपर्ने, छिमेकी देश भारतके सरह नेपालमापनि सुनमा भन्सार कर ६ प्रतिशत लागू गर्नुपर्ने लगायतका मागहरु उल्लेख छ ।

सरकारले आगामी बजेटमार्फत सुनमा २ प्रतिशत विलासिता र हिराजडित गरगहनामामा १३ प्रतिशत भ्याट लगाएको विरोधमा आन्दोलनमा उत्रिनु परेको पर्सा सुनचाँदी व्यवसायी संघका अध्यक्ष भुलन साह सोनारले बताए । सरकारको नयाँ नियमले वीरगन्जमा मात्रै चार सय बढी सुनचाँदी पसल र त्यसका सञ्चालक संकटमा परेको अध्यक्ष सोनारले बताए ।