वीरगञ्ज ।विपद् जन्य आगलागीका घटनालाई मध्यनजर गर्दै पर्सा जिल्लामा सम्भावित आगलागीको जोखिम न्यूनीकरण र नियन्त्रणका लागि आज विशेष अभ्यास कार्यक्रम सम्पन्न भएको छ।
जिल्ला प्रशासन कार्यालय पर्सा र मधेश प्रदेश विपद् व्यवस्थापन गुल्म, जनकपुर (हाल वीरगञ्ज) को संयुक्त आयोजनामा आयोजित कार्यक्रममा आगलागी नियन्त्रणमा प्रयोग हुने Fire Extinguisher को प्रयोग विधि सम्बन्धी प्रदर्शन (Demonstration) तथा संयुक्त अभ्यास गरियो।
कार्यक्रममा जिल्ला प्रशासन कार्यालय पर्साबाट सि.प्र.अ.को कमाण्डमा ५५ जना, मधेश प्रदेश विपद् व्यवस्थापन गुल्म जनकपुर (हाल वीरगञ्ज) बाट जु.प्र.अ.का २५ जना, साथै स्थानीय समुदायका १५ जना गरी जम्मा ९५ जनाको सहभागिता रहेको थियो।
यस अभ्यासले विपद्को बेला आगलागीबाट हुन सक्ने क्षति न्यून गर्न प्रभावकारी उपायहरूको अभ्यास र तयारीमा मद्दत पुर्याउने विश्वास गरिएको छ। सहभागीहरूलाई आगलागी नियन्त्रणमा Fire Extinguisher को सही प्रयोग विधि, सावधानी, र प्राथमिक प्रतिक्रिया दिने तरिकाबारे व्यवहारिक ज्ञान प्रदान गरिएको थियो।
