काठमाडौं ।सरकारले आर्थिक वर्ष २०८/८३ को बजेटमार्फत सुनचाँदी गहनामा लगाएको ’विलासिता कर’ को विरोधमा सुनचाँदी व्यवसायीहरूले आज काठमाडौँको न्यूरोड क्षेत्रमा प्रदर्शन गरेका छन् । नेपाल सुनचाँदी व्यवसायी तथा कालिगड संघर्ष समितिले सुनचाँदी गहनामा लगाइएको अनावश्यक कर तत्काल फिर्ता लिन माग गर्दै प्रदर्शन गरेको हो ।

व्यवसायीहरूका अनुसार, बजेटमा २ प्रतिशत विलासिता करको व्यवस्था अव्यवहारिक र अनावश्यक रहेकाले यसलाई तत्काल खारेज गर्नुपर्छ । उनीहरूले प्रदर्शनका क्रममा ’सुनचाँदीमा लगाएको विलासिता कर खारेज गर’, ’सुनको भन्सार ६ प्रतिशत लागू गर’, ’सुन चाँदी कारोबारको लागि प्रष्ट नीति नियमावली निर्माण गर’ लगायतका प्लेकार्ड प्रदर्शन गरेका थिए ।
यस विरोध अभियान अन्तर्गत व्यवसायीहरूले देशभरका आफ्ना पसलहरूमा कालो ब्यानर राखेर सांकेतिक विरोध जनाएका छन् भने कतिपय ठाउँमा पसल नै बन्दसमेत गरेका छन् । उनीहरूले आजै (बिहीबार) जिल्ला प्रशासन कार्यालयमा गएर ज्ञापनपत्र समेत बुझाएका छन् ।

व्यवसायीहरूले सुनचाँदीमा लगाइएको नयाँ करले उपभोक्तालाई थप भार पर्ने र यसले व्यवसाय नै धरापमा पर्ने चिन्ता व्यक्त गरेका छन् । उनीहरूले आफ्ना मागहरू सम्बोधन नभए थप सशक्त आन्दोलनका कार्यक्रम घोषणा गर्ने चेतावनीसमेत दिएका छन् ।