बारा । डिजेल कुपनको विषयलाई लिएर विवादमा परेकी इलाका प्रहरी कार्यालय सिमराकी प्रमुख डिएसपी शुभद्रा वाइवा सिमराबाट हटाइएकी छन्। प्रहरी प्रधान कार्यालयले छानबिनका लागि उनलाई तानेको छ भने उनको स्थानमा डीएसपी वेद जोशीलाई खटाइएको छ।

डिएसपी वाइवा र जीतपुरसिमरा उपमहानगरपालिकाका प्रमुख प्रशासकीय अधिकृत शान्तिराज प्रसाईबीच इन्धन कुपनको विषयमा झडप भएको थियो। वाइवाले उपमहानगरसँग १०० लिटर डिजेल माग गरेकी थिइन्। तर, कार्यालयले २० लिटर डिजेल र १० लिटर पेट्रोलको कुपन मात्र पठाएपछि उनी असन्तुष्ट बनिन्। त्यसपछि उनी साँझको समयमै आफैं उपमहानगरको कार्यालय पुगेकी थिइन्। कार्यालयबाट निस्कने तयारीमा रहेका सहसचिव प्रसाईलाई बस्न आग्रह गरिए पनि वाइवा आक्रोशित हुँदै प्रस्तुत भइन्। उनले जवानले ल्याएको कुपन च्यातेर टेबलमा फ्याँकेको बताइएको छ।

डिएसपी वाइवाले आफू अघिल्ला दुईपटक १०० लिटरका दरले कुपन लिँदै आएको बताउँदै यसपटक अचानक कटौती भएकामा असन्तुष्टि जनाएकी हुन्। उनले उक्त घटनाको फोटोसमेत खिचेर राखेको बताएकी छन्। उपमहानगरले बाराका सीडीओ वसन्त अधिकारीलाई लिखित रूपमा जानकारी दिएपछि प्रहरी मुख्यालयले छानबिन सुरु गरेको हो।

डिएसपी वाइवा यसअघि पनि विवादमा तानिँदै आएकी थिइन्। केही दिनअघि मात्रै सांस्कृतिक कार्यक्रममा माइकको तार चुँडाएको र विमानस्थलमा सर्वसाधारणलाई हतकडी लगाएको घटनाले उनको आलोचना भएको थियो। पछिल्ला गतिविधिपछि मुख्यालयले उनलाई फिर्ता बोलाएर नयाँ अधिकारी पठाएको हो।