वीरगञ्ज । लालबाबु सिंह । विश्व वातावरण दिवस २०८२ को पूर्वसन्ध्यामा प्रकृति सेवा प्रतिष्ठान नेपालले लगातार चौथो दिन साइकल रैलीको आयोजना गरी वातावरणप्रति जनचेतना फैलाएको छ।

प्रतिष्ठानले श्री शारदा माध्यमिक विद्यालयको सहकार्यमा सञ्चालन गरिरहेको पाँचदिने अभियान अन्तर्गत बुधबार वीरगञ्जको नेरामावि मुर्लीबाट शुरु भएको रैली शारदा मावि बहुअरीमा पुगेर सम्पन्न भयो।

रैलीमा समाजसेवी प्रकाश उपाध्याय प्रमुख अतिथि थिए भने प्रतिष्ठानका संस्थापक अध्यक्ष सरदार जसपाल सिंहको नेतृत्व, शारदा माविका प्रधानाध्यापक अनिल वर्णवाल, सहसचिव अबिनाश झा, सदस्य भोला प्रसाद र केदार गुप्तासहित बहुअरी र मुर्लीका कक्षा ९ र १० का ६७ जना विद्यार्थीको सहभागिता रहेको थियो।

शारदा माविबाट हरियो झण्डा देखाएर उद्घाटन गरिएको रैली हरपतगञ्ज, सुगौली, अठराहा, ड्राइपोर्ट हुँदै पुनः शारदा माविमा पुगेर समापन भयो।

कार्यक्रममा उपाध्यायले हावापानी, अन्न, फलफूल, वनस्पति लगायत जीवनदायिनी प्राकृतिक स्रोतहरूको संरक्षण आवश्यक रहेको भन्दै सबैलाई जिम्मेवार बन्न आग्रह गरे।

अध्यक्ष सिंहले “हरियो, सफा र स्वस्थ वीरगञ्ज” अभियान अन्तर्गत प्रत्येक वर्ष सरसफाइ तथा रैलीमार्फत जनचेतनामूलक कार्यक्रम गर्दै आएको जानकारी दिँदै सहभागी सम्पूर्ण शिक्षक, विद्यार्थी र सदस्यहरूप्रति आभार व्यक्त गरे।