पर्सा । श्रुति साह । आज सशस्त्र प्रहरी बल, नेपाल नं. १३ गण हेडक्वार्टर पर्साबाट खटिएको टोलीले वीरगञ्ज महानगरपालिका क्षेत्रका विभिन्न स्थानहरूबाट भन्सार छली गरी ल्याइएका रु. ७,३९,९५० बराबरका विभिन्न किसिमका सामानहरू नियन्त्रणमा लिई आवश्यक कारबाहीका लागि वीरगञ्ज भन्सार कार्यालय पर्सामा बुझाएको छ। यसै मितिमा प्र.सी.सु. गुल्म वीरगञ्जबाट खटिएको गाडी मोबाइल टोलीले बहुअरी चोकबाट परवानीपुरतर्फ जाँदै गरेको प्रदेश २–०३–००१ च ४१६७ नम्बरको बोलेरो पिकअप गाडीलाई वीरगञ्ज महानगरपालिका–२५, बहुअरी चोकमा रोकेर जाँच गर्दा उक्त गाडीमा लोड गरिएको ब्रोइलर कुखुरा सम्बन्धी बिल, VCTS तथा भेटेरिनरी प्रमाणपत्र नभएको पाइएको थियो। गाडी चालकले सो गाडी बेवारिसे अवस्थामा छाडेर भागेपछि प्रहरीले उक्त गाडीलाई नियन्त्रणमा लिई गाडीको भन्सार मूल्याङ्कन रु. २५,००,००० र कुखुराको मूल्य रु. १,८४,००० बराबर निर्धारण गरेको छ। नियन्त्रणमा लिइएको ब्रोइलर कुखुरा आवश्यक प्रक्रिया पुरा गरी आजै नष्ट गरिएको हो। साथै, सोही गुल्मले विभिन्न सीमा नाकाहरूबाट रु. २,७३,१६० बराबरको मोबाइल तथा इलेक्ट्रिक सामानहरू समेत नियन्त्रणमा लिई आवश्यक कारबाहीका लागि वीरगञ्ज भन्सार कार्यालयमा दाखिला गरेको छ।

सशस्त्र प्रहरी नायब उपरीक्षक तथा सूचना अधिकारी देबेन्द्र बहादुर सिंहका अनुसार सशस्त्र प्रहरी बलले सीमा क्षेत्रमा भन्सार छली तथा तस्करी नियन्त्रण गर्न निरन्तर निगरानी तथा कडाइका साथ कारबाही जारी राखेको छ।