बिरगञ्ज । नेपाल प्रेस युनियनको ३४औं स्थापना दिवसको अवसरमा नेपाल प्रेस युनियन पर्सा शाखाले नारायणी अस्पतालमा उपचाररत बिरामीहरूलाई फलफुल वितरण गर्दै सामाजिक उत्तरदायित्व पूरा गरेको छ।

बिहीबार आयोजित कार्यक्रममा अस्पतालको प्रसूति वार्ड, मेडिसिन वार्ड, आइसियु, सिसियु, पोष्टअप र सर्जिकल वार्डमा भर्ना भएका दुई सयभन्दा बढी बिरामीलाई फलफुल वितरण गरिएको प्रेस युनियन पर्साका अध्यक्ष विजय महतोले जानकारी दिए।

कार्यक्रममा बिरगंज महानगरपालिकाका उपप्रमुख इम्तियाज आलम प्रमुख अतिथिका रूपमा सहभागी थिए। उनले फलफुल वितरणका क्रममा बिरामीहरूको अवस्थाबारे जानकारी लिँदै गुनासो सुनेका थिए र तत्काल समाधानका लागि सम्बन्धित निकायलाई निर्देशनसमेत दिएका थिए।

फलफुल वितरण कार्यक्रममा नेपाली कांग्रेस पर्साका कार्यवाहक सभापति रामनारायण कुर्मी विशिष्ट अतिथि थिए भने प्रेस युनियनका केन्द्रिय सदस्य श्रीराम रायमाझी, नेपाल पत्रकार महासंघ पर्सा शाखाका अध्यक्ष ओमप्रकाश खनाल, नारायणी अस्पतालका वरिष्ठ चिकित्सक डा. उदनारायण सिंहलगायतको उपस्थिति थियो।

उपप्रमुखका प्रेस सल्लाहकार महमद सदाबले कार्यक्रममा सहभागी सबैले प्रेस युनियनको सामाजिक योगदानको प्रशंसा गरेको जानकारी दिए। कार्यक्रममा सहभागीहरूले अस्पतालमा रहेका बिरामीप्रति आत्मीयता र सेवा भाव प्रकट गर्दै प्रेस युनियनको स्थापना दिवसलाई सामाजिक क्रियाकलापसँग जोडेर मनाउनु सकारात्मक पहल भएको बताएका थिए।