पर्सा | कानुनी शासन, न्यायमा पहुँच र विधिको सर्वोच्चतालाई बलियो बनाउने उद्देश्यका साथ पर्सा जिल्ला अदालतले आज एक विशेष कार्यक्रम आयोजना गरी कानुन दिवस २०८२ भव्य रूपमा मनाएको छ। कार्यक्रममा पर्सा जिल्ला अदालतका प्रमुख जिल्ला न्यायाधीश श्री दिपक खनालले अदालत प्राङ्गणमा नव निर्माण गरिएको Statue of Lady Justice (न्यायकी देवीको मुर्ति) को विधिवत अनावरण गरे। न्यायकी देवीको यो मुर्ति न्यायप्रतिको निष्पक्षता, विवेक र सत्यको प्रतीकका रूपमा स्थापना गरिएको हो।

कार्यक्रमको औपचारिक शुभारम्भमा अदालतका श्रेस्तेदार प्रभाकर कुमार मल्लिकले शुभकामना सन्देश व्यक्त गर्दै कानुन दिवसको ऐतिहासिक पृष्ठभूमिबारे प्रकाश पारे। उनले भने, “व्यक्तिको होइन, विधिको शासन होस्, कानुन सबैका लागि समान होस्, न्यायमा सहज पहुँच होस् भन्ने उद्देश्यले कानुन दिवस मनाइन्छ।” उनले स्वतन्त्र, निष्पक्ष र सक्षम न्यायपालिका स्थापनाका लागि नागरिक, कानुन व्यवसायी र सबै निकायको सहकार्य जरुरी रहेको उल्लेख गरे।

कार्यक्रममा विभिन्न क्षेत्रबाट विशिष्ट व्यक्तित्वहरूको उपस्थिति रहेको थियो। सहभागीहरूमा सम्पूर्ण न्यायाधीशहरू, अदालतका कर्मचारीहरू, नेपाल बार एसोसिएसन पर्साका अध्यक्ष अधिवक्ता कमलमोहन पोख्रेल, बिरगंज स्कुल अफ ल का अध्यक्ष अधिवक्ता चन्द्रीका प्रसाद पटेल, कानुन विषय अध्ययनरत विद्यार्थीहरू, जिल्ला प्रशासन कार्यालय (CDO), मालपोत कार्यालयका हाकिम, पर्सा कारागारका जेलर, जिल्ला प्रहरी कार्यालय (DSP) लगायतका प्रतिनिधिहरू उपस्थित थिए।

कार्यक्रममा सहभागीहरूले कानुनी शासनको सुदृढीकरण, न्यायमा पहुँचको सहजता, र जनमानसमा कानुनी चेतनाको अभिवृद्धि जस्ता विषयमा धारणा राखेका थिए। प्रमुख जिल्ला न्यायाधीश खनालले कानुन दिवसले सबै सरोकारवालामा प्रेरणा प्रदान गर्ने विश्वास व्यक्त गर्दै न्याय सबैका लागि समान र सहज होस् भन्ने सन्देश यो दिवसले दिने बताए।

कार्यक्रमको समापनमा पर्सा जिल्ला अदालत परिवारले सबैलाई कानुन दिवस २०८२ को शुभकामना व्यक्त गर्दै, न्याय, विधि र लोकतन्त्रको संस्थागत विकासमा सबैको सकारात्मक सोच र सहकार्य अपरिहार्य रहेको सन्देश दिएको छ।