वीरगन्ज । पर्सा जिल्लाको वीरगञ्ज-१६ स्थित वीरगञ्ज भन्सार कार्यालयअन्तर्गत भन्सार चेकजाँच विन्दु भन्दा करिब ५० मिटर अगाडि त्रिभुवन राजपथ सडकखण्डमा सवारी साधन चेकजाँच गर्ने क्रममा सशस्त्र प्रहरी बल नेपाल, सशस्त्र प्रहरी गुल्म वीरगञ्जबाट खटिएको टोलीले स्रोत नखुलेको नगदसहित तीन जना भारतीय नागरिकलाई नियन्त्रणमा लिएको छ।

भारतबाट नेपालतर्फ आउँदै गरेको BR 22 P 8300 नम्बरको सेतो रंगको भारतीय नम्बर प्लेट भएको स्कार्पियो गाडीको सिट पछाडिको पकेटभित्र लुकाई ल्याइएको नेपाली रुपैयाँ ९ लाख ५९ हजार नगद फेला पारिएको सशस्त्र प्रहरीले जनाएको छ। सोही नगदसहित गाडी र त्यसमा सवार तीन भारतीय नागरिकलाई नियन्त्रणमा लिई आवश्यक कारबाहीका लागि वीरगञ्ज भन्सार कार्यालयमा बुझाइएको छ।

भन्सार कार्यालयका अनुसार उक्त स्कार्पियो गाडीको भन्सार मूल्याङ्कन रु. ३० लाख गरिएको छ।
गाडीमा सवार व्यक्तिहरूमा भारतको पश्चिम चम्पारण जिल्लास्थित ग्राम पंचायत वडा नं ७ का करिब ५९ वर्षीय विजय प्रसाद, वडा नं १२ का ४६ वर्षीय मनोज कुमार सहनी, र वडा नं २७ का ४३ वर्षीय सन्तोष कुमार श्रीवास्तव रहेका छन्। सशस्त्र प्रहरीले उनीहरूलाई स्रोत नखुलेको रकमसहित नियन्त्रणमा लिई भन्सार कार्यालयमा बुझाएको हो।