पोखरिया | शैलेश गुप्ता | पर्सा जिल्लाको पोखरिया नगरपालिका वडा नम्बर १ बनकटवास्थित छठघाट तथा रामजानकी मन्दिर परिसरमा निर्माण हुन लागेको बाउन्ड्रीवालको शिलान्यास एक विशेष समारोहबीच सम्पन्न भएको छ। उक्त शिलान्यास मधेश प्रदेशका खेलकुद तथा समाज कल्याण मन्त्री प्रमोद जयसवाल र पोखरिया नगरपालिकाका नगर प्रमुख प्रद्युमन प्रसाद चौहानले संयुक्त रूपमा गरेका हुन्।

मधेश प्रदेश सरकारको खेलकुद तथा समाज कल्याण मन्त्रालयबाट २५ लाख रुपैयाँको लागतमा निर्माण हुने बाउन्ड्रीवाल गुणस्तरीय र समयमै सम्पन्न होस् भन्ने उद्देश्यले मन्त्री जयसवालले उपभोक्ता समिति र ठेकेदारलाई स्पष्ट निर्देशन दिएका छन्। साथै, निर्माणको गुणस्तरमा कुनै सम्झौता नगरिने उल्लेख गर्दै स्थानीयवासीलाई कामको निगरानी गर्न आग्रहसमेत गरेका छन्।

कार्यक्रम वडा नम्बर १ का वडाध्यक्ष प्रमोद गिरीको अध्यक्षतामा सम्पन्न भएको थियो। कार्यक्रममा प्रमुख अतिथि मन्त्री प्रमोद जयसवाल, विशिष्ट अतिथि नगर प्रमुख प्रद्युमन प्रसाद चौहान, उप–प्रमुख रूबी कुमारी ठाकुर, कार्यपालिका सदस्य राधा साह कानु, नेकपा एमाले पोखरिया नगर कमिटी अध्यक्ष विंध्याचल ठाकुर, सचिव सन्तोष गिरी, नेता राजनारायण कुर्मी, समाजसेवी दीपक ठाकुर, वडा सदस्यहरू तथा स्थानीय भद्रभलादमीहरूको उपस्थिति रहेको थियो।

स्थानीय धार्मिक तथा सांस्कृतिक गतिविधिका लागि महत्त्वपूर्ण मानिने छठघाट र रामजानकी मन्दिरको संरक्षण तथा सौन्दर्यकरणका लागि बाउन्ड्रीवाल निर्माणले सकारात्मक प्रभाव पार्ने विश्वास गरिएको छ।