वीरगञ्ज | वीरगञ्ज महानगरपालिकाका नगरप्रमुख श्री राजेशमान सिंहज्यूसँग वीरगञ्ज उद्योग वाणिज्य सङ्घको प्रतिनिधिमण्डलले भेटघाट तथा छलफल गरेको छ। सङ्घका अध्यक्ष श्री हरिप्रसाद गौतमज्यूको नेतृत्वमा गएको टोलीले नगरप्रमुखको कार्यकक्षमा भेट गर्दै वीरगञ्जको विकास, समृद्धि र व्यवस्थापनका विषयमा संस्थागत सहकार्य गर्ने प्रतिबद्धता व्यक्त गरेको हो।

भेटका क्रममा नगरप्रमुख श्री सिंहज्यू र सङ्घ अध्यक्ष श्री गौतमज्यूले वैभवशाली, समुन्नत, स्वच्छ र समृद्ध वीरगञ्ज निर्माणका लागि महानगर र उद्योग वाणिज्य सङ्घबीच सहकार्य आवश्यक रहेकोमा जोड दिएका थिए। दुवै पक्षले समन्वयमा रही भविष्यमा विभिन्न कार्यक्रम र पहलहरू अघि बढाउने सहमति जनाएका छन्।

भेटमा सङ्घका वरिष्ठ उपाध्यक्ष श्री माधव राजपाज्यू, महासचिव श्री शिवजीप्रसाद साह कलवारज्यू, कोषाध्यक्ष श्री अनोज रुँगटाज्यू, सचिव द्वय श्री प्रेमचन्द्र गोयलज्यू र श्री सुशान्त चाचानज्यू, सह–कोषाध्यक्ष श्री निरज अग्रवालज्यू, सह–सचिव द्वय श्री नरेशकुमार अग्रवाल टिवडेवालज्यू र श्री अनुप अग्रवालज्यू तथा प्रशासकीय अधिकृत श्री मनोज उपाध्यायज्यूको उपस्थिति रहेको थियो।

यो भेटघाटलाई वीरगञ्जको दीर्घकालीन विकास योजनामा निजी क्षेत्र र स्थानीय सरकारबीचको सम्बन्ध सुदृढ गर्ने अवसरका रूपमा हेरिएको छ।