वीरगन्ज । आज मिति २०८२ साल बैशाख १९ गते शुक्रबार बिहान ७:१५ बजे वीरगञ्ज महानगरपालिका वडा नं. ०१ को बजार छपकैया स्थित डोम बस्ती टोलमा निःशुल्क घुम्ती स्वास्थ्य शिविर आयोजना गरिएको छ। सामुदायिक प्रहरी साझेदारी कार्यक्रम अन्तर्गत ग्रीन सिटी सामुदायिक सेवा केन्द्र, ग्रीन सिटी सामुदायिक प्रहरी सेवा केन्द्र आदर्श नगर, रुँगटा वेलफेयर सोसाइटी तथा वीरगञ्ज सामुदायिक आँखा अस्पतालको संयुक्त आयोजनामा सो शिविर सञ्चालन गरिएको हो।

शिविरका प्रमुख अतिथि जिल्ला प्रहरी कार्यालय पर्साका प्रहरी उपरीक्षक गौतम मिश्र थिए भने कार्यक्रमको अध्यक्षता ग्रीन सिटी सामुदायिक सेवा केन्द्रका अध्यक्ष जयप्रकाश खेतानले गरेका थिए। कार्यक्रममा नागरिक समाजका प्रतिनिधि, समाजसेवी, सुरक्षाकर्मी, सञ्चारकर्मीहरू तथा स्थानीय बासिन्दाहरूको उल्लेख्य सहभागिता रहेको थियो।

स्वास्थ्य शिविरमा आँखा, कान र दाँतको निशुल्क सामान्य परीक्षण तथा उपचार गरिएको थियो। शिविरबाट महिला १३० जना र पुरुष ८० जना गरी जम्मा २१० जना लाभान्वित भएका थिए। कार्यक्रम बिहान ९:३० बजे सम्पन्न गरिएको थियो।

कार्यक्रममा सहभागिता जनाउने विशिष्ट व्यक्तिहरुमा सशस्त्र प्रहरी उपरीक्षक राधेश्याम धिमाल, प्रहरी वरिष्ठ नायव निरीक्षक केदार तिमिल्सेना, प्रहरी नायव निरीक्षक प्रदिप कुमार गोले, सामुदायिक आँखा अस्पतालका महेश सिंह धामी, समाजसेवी कमल चौगाई, कैलाश बजाज, लालबाबु गुप्ता, श्याम प्रसाद साह, प्रहरी वरिष्ठ हवल्दार प्रेम राम तथा प्रहरी सहायक हवल्दार अजिता घिमीरे लगायतको उपस्थिति रहेको थियो।

यस कार्यक्रमले डोम बस्तीका विपन्न समुदायको स्वास्थ्य पहुँचमा सहजता ल्याएको भन्दै सहभागी स्थानीयहरूले आयोजकप्रति आभार प्रकट गरेका छन्।